PASIA LAISENE 501 A LE TAMMS
O se tala fiafia i le tapua’iga a le sosaiete a tama ma tina matutua o le “Toe Afua Mai Matua Samoa” (TAMMS) ina ua pasia le latou laisene 501 lea e mafai ai ona agava’a e talosaga mo ni fa’atupega aloa’ia mai le malo tele. O lea taumafaiga ua latou fa’ailoa mai, “Fa’afetai tele i le taumafaiga sa gapatia ma se tasi o tama’ita’i agalelei o Eileen Solaita aua o ia lea sa ia taumafai maia lenei laisene mo i matou.”
Peita’i, ua le gata la ina maua e le TAMMS lea tulaga, ae ua latou maua fo’i so’otaga ma le Matagaluega o A’oga lea ua mafai ona talia e le Fa’atonu Vaitinasa Dr. Salu Hunkin-Finau le talosaga ina ia fa’aaogaina lenei vasega o matua e galulue fa’afaufautua fa’aleaganu’u ma amio fa’asamoa ia pulea i totonu o lotoa a a’oga.
Ua fa’ailoa mai e to’a 22 i latou ua filifilia ua agava’a mo nei avanoa faigaluega i le DOE i le tu’uaga o a’oga, peita’i e tusa ma le to’a 40+ sui totino o le TAMMS o i ai nei. O nisi o i latou o le a tatalia nisi o avanoa e maua mai i ni fa’atupega a le Criminal Justice lea ua mae’a fa’atulaga mai le latou fonotaga ma le TAMMS i le aso Gafua.
Olo’o faia nisi o polokalama i totonu o le TAMMS e ala i galuega alofilima e agava’a ai suitotino ta’itasi, e mafai ona latou gaosia Ie Elei ma fa’atau atu, po’o le Mitiafu ma Ie lavalava Tie Dye e fa’atau atu fo’i. O nisi o tina o lo’o gaosia latou ula fugala’au manogi ma fa’atau i le lautele.
TIUTE & A’AFIAGA LAMATIA I LE SUAU’U MASA’A
Na malaga fa’apitoa mai le General Manager o le Clean Island Council - Kim Beasley mo toe tima’iga i le vasega o tagata faigaluega i so’o se matagaluega o lo’o feagai ma galuega tau le sapalai o suau’u, fela’uaiga o le suau’u, galulue i lotoa o Kamupani Suau’u ma Kamupani Pamu Kesi i totonu o le teritori, atoa ai tagata faigaluega i Kamupani Va’a Suau’u ma le aufaigaluega a le Uafu fa’atasi ai ma leoleo uafu, ina ia toe tima’ia i tiute ma faiva o galulue ai, atoa ma mea e ono tutupu mai e afaina ai lo latou soifua, i so’o se taimi e tiute ai i latou.
O sui mai matagaluega ma Ofisa o le malo faatasi ai ma kamupani tua sa auai i le aoaoga i le aso Lua i le Gov. Rex Lee Auditorium.
Saunoa Beasley e faapea, “I le tulaga o suau’u masa’a, ua iloa lelei e tagata faigaluega e ono tutupu nei mea, pe afai ua fa’aletonu so’oga o paipa e fa’auia ai le suau’u mai va’a se’ia o’o mai i tane, pe ua va’ai toto’a i tatou uma o faigaluega i nei kamupani suau’u ma va’a suau’u po’o ana fea na suia ai ma va’ai toto’a po’o atoatoa pea le tulaga lelei o nei so’otaga o paipa suau’u?”
“Ua iloga mai e mana’o i tatou e tulaueleele loa va’a suau’u faia loa tatou galuega fa’atino ia mae’a pamu mai le suau’u ma fa’atutumu a tatou tane, peita’i o galuega e fa’amautinoa ai o lelei ona fa’atino nei tiute uma, e ao ina mua’i faia a’o lei tuta mai va’a suau’u i le tatou uafu.”
O nisi o fautuaga sa fa’afofogaina, “Ia mataala i tiute, ma va’ai toto’a i mea e masani ona tutupu, afai fo’i ua tupu se fa’aletonu, ua tatau ona e iloa lelei le gaoioiga e mua’i faia, ia fa’asaoina lou ola atoa ai ma isi, ua e iloa lelei fo’i lau mea e fai ma le mea e tupu mai ai, pe afai e te faia.”
Saunoa atili Beasley, “O lo ua mae’a fa’apineina le tatou nei Malo, ona o tulaga lelei ona fa’atino le latou Fuafuaga Fa’ataoto o le Fa’amamaina o Suau’u Masa’a i le tatou ogasami, ae maise ai e leai o nisi o afaina le soifua ona o le fa’atinoina o latou tiute a’o galulue i tofiga eseese o feso’ota’i ma le fa’amamaina o suau’u masa’a i le tou malo.”
E fa aso o lenei fonotaga fa’aleaoaoga. O le taeao nei e amata lea i le o uma o pulega ma tagata faigaluega usufono i le skimmer ina ia fa’atino ai se latou galuega lavea’i ina ia le masa’a le suau’u i le sami. E toe taliu mai i latou i uta ma tapena loa le fa’ata’ita’iga tele e faia i le aso Faraile.
I le fa’ai’uga o lenei a’oa’oga, e ao i sui ta’itasi ona mautinoa ua malamalama lelei i lona tiute, mea e nofouta i ai ina ia le tutupu mai ni fa’aletonu ma a’afia ai lona ola, ia mautinoa fo’i ua mafai e le sui faigaluega, ona matau ni mea o le a alia’i mai pe afai e le fa’aleleia ni mea ua va’ai ma matauina e tatau ona suia, e taofia ai le tutupu o ni fa’aletonu tau le suau’u masa’a, mu ma isi mea fa’apena.