E to’a 11 tausima’i pasi LPN ma le to’a 9 o tausimai lesitala (RN) ua mae’a fa’apine i le sauniga i le Rex Lee Auditorium i Utulei i le afiafi o le aso Lua na te’a nei.
“Ona o lenei aotelega o Tausima’i ua agava’a i latou i so’o se itu o le auaunaga e tausia lelei gasegase ma e gasolo atu mo talavai masani i le falema’i tele i Faga’alu atoa ma isi falema’i fa’aitumalo o le atunu’u, o lea e fa’afiafiaina le agaga, ona ua fa’alava ai se mana’omia mo ni Tausima’i agava’a ua leva ona tulitulimatagau mai e le Matagaluega o le Soifua Maloloina, fa’apea ma le Pulega o le Falema’i LBJ,” o se tala fiafia lea mai le fa’atonu o Aoaoga Fa’a-Tausima’i i le Kolisi Tu’ufa’atasi o Amerika Samoa, Lele Ah Mu.
O le ta’ita’i o le sauniga le susuga le Faife’au EFKAS Johnny Salilo Fano i Fagaitua. O le ‘auga o lenei sauniga mamalu sa fa’aleo: “O le fa’amaoni i mea iti, e fa’amaoni fo’i i mea tetele, a’o le le fa’amaoni i mea iti, e le fa’amaoni fo’i i latou i mea tetele.”
O se manulauti ua fa’ailoa ai, “O a lava tiute ua fa’atonuina lenei aufaigaluega e fa’atino e fesoasoani ai i mapuitiga o le atunu’u, ua au se auaunaga e faia ma le fa’amaoni ae maise o le alofa ma le onosa’i.”
Sa fa’atino fo’i le latou tautoga, ona fa’apine lea o i latou ta’ito’atasi lava e o latou aiga na filifilia e le sui tausima’i pasi, ma fa’aula i latou e o latou aiga.
“E mautinoa e tele taimi e le aoga ai i latou nei i ni fe’au i aiga, e umi taimi o faigaluega ma e le lava fo’i le moe. Peita’i i mafutaga ua outou onosa’ia lo latou olaga taumafai i mataupu ma tiute sa tau fa’amasani ai i faiva fa’atausima’i, fa’afetai ua a’e manumalo le taumafaiga, ae sa le faia na’o i latou lea taumafaiga. Sa outou lutia fa’atasi ma i latou, fa’afetai tele le alofa ma le onosai i matua, aiga ma fanau,” o se tautalaga lea a le fa’atina o tausima’i i Amerika Samoa, le faletua o Tofiga Tufele.
O le pulouina o nei tausima’i sa nafa lea ma le faletua o Tofiga Tufele ona soso’o lea ma le avanoa fo’i sa tu’uina i le faletua o Simamao Tuato’o, Fa’atonu o tausima’i o Amerika Samoa.
Sa fa’afofogaina fo’i le fofoga taumolimoli na tapena i ai le vasega o tausima’i pasi i lenei tausaga, le latou uso tausima’i ua avea ma Supervisor Surgical Ward; Annie Ma’ae RN. Sa ia fa’afetaia lona avanoa, peita’i o lana fe’au taua, sa ia fa’ailoa atu ai i nei tausima’i, “Ia outou mautinoa, o lenei galuega e tutusa lelei lona a’oa’oina i Amerika ma kosi lea ua outou pasia nei, e leai la se mea e te naunau ai fua i fafo, ae o lea ua i lou atunu’u ma lou kolisi lenei polokalama e te agava’a ai i tiute i so’o se falema’i i le Iunaite Setete atoa.”
Ua ia molimauina lenei tulaga, ona sa ia maua se avanoa e alu atu i fafo, ma sa faigaluega ai, ma ua ia iloa lelei ai, e tutusa lelei ona agava’a ma e o lo’o tausaili i fafo, peita’i, e faigata ona e ulufale i le a’oga fa’atausima’i i fafo e sili mamao ona faigofie ai iinei.
“O la’u tima’i, ia le muta lou fa’amoemoe e te a’oa’oina atili i lau kosi lenei, ia fa’aauau ona e tausaili ia maua isi tusi pasi i luga atu, ia atili ona e atamai ma agava’a atili ai mo nisi mea e te le o lelei ai i lenei vaitaimi e tusa o le tausiga ma le togafitiga o gasegase eseese.”
“O lo ua i ai fo’i le isi vaega o le Soifua Maloloina, e ese fo’i ona ituaiga o a’oa’oga ma agava’a e fa’amalosia ai, o na mea uma e tatau ona matua maua’a uma i so’o se tausima’i, ae ia muamua lava, ia lelei ona e feutaga’i ma tagata, ma ia tamau le fa’aaloalo e feutaga’i ai ma o tatou tagata matutua i taimi uma, o la tatou lea agaifanua e tatau ona mautu ia te outou a’o faia nei faiva.”
I fa’ailoga na taua’aoina, sa mua’i fa’ailoa ai, le Tausima’i Pasi sa ia ausia togi maualuluga i le Practical Work na maua lea e Iris Midori Hirata LPN e 80.6%. Mo le vaega o a’oa’oga tau Clinical ua mauaina lea e le tama’ita’i o Lorraine Kirsten Fano.
O le Tausma’i Lesitala sa ia mauaina le togi maualuga i le Theory ma mauaina le fa’ailoga a Fa’au’uga Suesue Achica o Meli Ane Manulo e 89.07% ona togi. O ia fo’i lea sa ia toe mauaina le fa’ailoga mo le Dept. of Health Nurses Award sa taua’aoina e le tama’ita’i o Margerat Sesepasara ma Dottie Si’avi’i.
O le fa’ailoga mulimuli na tapena i ai le alo ma fanau a Toasavili ma Pisia mai Vailoatai e fa’amanatuina ai le olaga fa’atausima’i taumafai o “Iva Pisia Salazar” na mauaina lea e Meli Ane Manulo ma Sinaletina’e Jermane Le’aupepe mai le vaega o Tausimai Lesitala e to’aiva na fa’apineina taumafaiga i lenei tausaga.
O le meaalofa lea sa taumafai i ai aiga o Iva Pisia Salazar e ta’i $750.00 mo le sui e to’atasi o lona uiga o le aotelega o nei fa’ailoga e lua e $1,500. ma sa tutula’i ai le tama’ita’i o Vailala Smith na te taua’aoina fa’apitoa, o se uso moni ia Iva Pisia Salazar.
O se tasi lea o ali’i Tausimai Pasi ua ta’auina lona pine ma ua fa’apineina o ia e lona to’alua lalelei i lea sauniga matagofie ma le mamalu.
[ata: Leua Aiono Frost]