I le toe tolopo ai o le tu’uina atu o se fa’asalaga a le fa’amasinoga maualuga fa’asaga i le ali’i o Alatuna Simi, ua poloaina ai e le fa’amasino sili le loia a le malo ia Tyler Genzel, ina ia fa’ailoa atu i le fa’amasinoga i le vaiaso fou, po o i ai se falepuipui tumau a le malo i Manu’a, e mafai ai ona tuli le fa’asalaga a le ali’i o Simi, pe afai e manatu le fa’amasinoga e fa’asala o ia i le toese mo le 15 tausaga.
O lea fa’atonuga a Kruse, o sana tali atu lea i le fa’afinauga a le malo, ina ia fa’asala Simi mo le umi e 5 tausaga, a ia fa’aauau pea ona taofia o ia i le nofoaga o lo o taofia ai nei mo le tuliina o lana fa’asalaga.
O Simi o lo o taofia i totonu o se potu i le nofoaga autu a le Ofisa o Leoleo i Fagatogo, ona o le manatu e aveese mai o ia mai le toese i Tafuna, le nofoaga o lo o taofia ai isi ali’i e to’alua sa latou auai fa’atasi i le osofaiga o le faleoloa o le Gold Gonda i Faga’alu i le 2014.
O Simi na avea ma molimau autu a le malo i le fa’amasinoga autu a le ali’i o Samuelu Wright, o ia lea sa autu i le fa’atinoina o le osofaiga.
Ao le’i toe tolopo le mataupu a Simi e toe fofogaina i le aso Faraile o le vaiaso nei, na maua le avanoa e fa’atoese ai le ua molia i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe mafuta atu ai i si ona to’alua ma lana fanau atoa ai ma lona aiga.
Na taua e Simi lona lagona o le sese ma le salamo e tusa ai o lana solitulafono sa faia, ma ua ia a’oa’oina fo’i se lesona aoga talu mai le taimi umi na taofia ai o ia i le toese.
Na talosaga lana loia fautua i le fa’amasinoga mo se fa’asalaga mama mo Simi, ona o lea sa avea o ia ma molimau autu a le malo, sa ia fesoasoani fo’i i leoleo i le taimi atoa sa su’esu’eina ai lenei mataupu.
Na fa’ai’u le talosaga a le loia a Simi i lona finauina lea o le fa’amasinoga mo se avanoa e fa’aauau ai pea ona taofia Simi i le nofoaga o lo o i ai o ia i le taimi nei, ona o le tulaga lamatia o lona saogalemu i gaioiga tau fa’amata’u a le ali’i o Wright, lea sa ia molimau fa’asaga i lana mataupu.
Na fa’amanatu e le loia i ali’i fa’amasino se fa’alavelave na tau tula’i mai i totonu o le potu fa’amasino i le vaiaso na te’a nei, ina ua mae’a ona lau le fa’asalaga a le ali’i o Wright, ma ia savali sa’o atu ai ma nofo i luma o Simi, ma taumafai e fai ni gaioiga e fa’amata’u ai o ia, ae o le mata’ala o le Masela o le fa’amasinoga na mafua ai ona leai se fa’alavelave na tula’i mai.
Na te’i Kruse i le fa’amatalaga a le loia a Simi, lea fo’i na fa’aluaina e le loia a le malo, peita’i na fa’ailoa i ai e le ali’i Masela ia Michael Nick ia Kruse e fa’apea, e tula’i mai le fa’alavelave e pei ona taua e loia, ae o le taimi lea ua malolo ai ali’i fa’amasino mo le faia o se fesuiaiga i fa’amasino e nofoia le laulau a fa’amasino i lena taeao.
Saunoa Kruse e fa’apea, ana tula’i mai le fa’alavelave lea i luma o ali’i fa’amasino, o le mea moni lava e molia Wright i lona gaupule i poloaiga a le fa’amasinoga.
Ina ua maua le avanoa o Genzel e finau ai mo se fa’asalaga a Simi, sa ia fa’ailoa ai i le fa’amasinoga le tele o le sao o Simi mo le malo i le fa’amasinoina o le mataupu a Wright atoa ai ma le isi ali’i sa latou to’atolu i le po o le osofaiga, le ali’i o Falefatu Asi.
Ae na taua e Genzel e fa’apea, ana leai Simi na fesoasoani i leoleo i le tau sailiina o fa’amatalaga e fesoota’i mai lenei mataupu, e le mafai e le malo ona tu’u fa’atasia le tele o fa’amatalaga ma molimau e uiga i le mea sa tupu, ma mafai ai loa ona fa’a falepuipui ali’i e to’alua ia Wright ma Asi.
E ta’i 15 tausaga lea ua fa’asala ai ia Wright ma Asi e taofia ai i laua i le toese i Tafuna.
Na finau fo’i le itu a le malo e fa’apea, e ui sa aofia Simi i le osofaiga, peita’i e le tutusa le matuia o lona a’afiaga i lenei mataupu fa’atasi ai ma alii e to’alua ua faasala i le toese.
Na faaiu le faafinauga a Genzel i lona talosagaina lea o le fa’amasinoga ina ia fa’asala Simi i le toese mo le 5 tausaga, ma ia fa’aauau pea ona tuli lana faasalaga i le nofoaga autu a le Ofisa o Leoleo i Fagatogo.
Na fesili Kruse ia Genzel pe sa la talanoa ma le alii Komesina o Leoleo ia Save Liuato Tuitele e fa’atatau i le taofia ai o Simi i le ofisa o leoleo, ae na tali Genzel, ua uma ona la talanoa ma le isi ta’ita’i leoleo, ma ua ia fa’amaonia atu ia te ia le mafai lea ona taofia pea Simi i le nofoaga o lo o i ai i le taimi nei.
Na sii i luga le si’ufofoga o Kruse ma ia fai atu ia Genzel, “E ese lava lou talanoa ia Save ese lou talanoa i le ta’ita’i leoleo e uiga i le mea e loka ai Simi, ma, afai fo’i e manatu le fa’amasinoga e fa’asala o ia mo le 15 tausaga, e mafai ona taofia ai pea o ia i le ofisa o leoleo mo le 15 tausaga?” o le fesili lea a Kruse ma toe sui ai le tali a Genzel ma faapea atu i ai, “E mafai fo’i ona taofia o ia i Manu’a.”
Na fesili Kruse ia Genzel po o i ai se falepuipui tumau i Manu’a, ae na tali le ali’i loia, “O lo o i ai le falepuipui i Manu’a, lea fo’i sa taofia ai le isi pagota ina ua poloa’i e le fa’amasinoga le ave o ia i Manu’a.”
Na lulu le ulu o Kruse ma ata, ona toe fa’apea atu lea ia Genzel, “O i ai mo’i se falepuipui tumau i Manu’a e mafai ona taofia ai pagota e pei o Simi mo le umi e oo atu i le 15 tausaga.” O le fesili lea a Kruse na vaaia ai le nofo o Genzel ua le toe tali, ma poloaina ai loa o ia e le fa’amasinoga ina ia fa’ailoa atu i le vaiaso fou, po o i ai se falepuipui tumau i Manu’a e mafai ona tuli ai fa’asalaga a pagota mo se taimi umi.