O le aso To’ona’i o le vaiaso nei lea ua fa’amaonia mai e se sui sooupu o le Asosi Fusu a le ASBF (American Samoa Boxing Federation), o le a fa’ataunu’uina ai lana ta’amilosaga lona lua o le King of the Rock 2.
Na taua e le susuga a Zena Iese, o ia lea o le sui sooupu mo le ASBF i lenei fa’amoemoe atoa i se fa’atalatalanoaga ma le Samoa News i le vaiaso nei e faapea, ua mae’a ona fa’amautu fuafuaga uma mo le vaega lona lua o le latou ta’amilosaga o fusuaga i le fa’aiuga o le vaiaso nei, ua mautu fo’i ali’i fusu e tausinio i ta’aloga mo fusi e fa o lo o fa’ata’amilo a le ASBF.
“E 10 aupaga o le a maimoa i ai le atunu’u i le fa’aiuga o le vaiaso nei, o ia aupaga e aofia ai paga amata e 6, atoa ai ma paga fa’apitoa e 4 mo fusi o aupaga eseese ua sauni ali’i fusu mai kalapu fusu eseese i le atunu’u e tausinio i ai,” o le saunoaga lea a Iese.
E pei ona silafia e le atunu’u, o le ulua’i ta’amilosaga a le King of the Rock i le masina o Ianuari 2016, na mafai ai ona tausinio tama fusu e to’a 8 mai kalapu fusu eseese i le atunu’u i fusi e fa ua mae’a ona saunia e le ASBF.
“Ina ua mae’a le ulua’i ta’amilosaga a le King of the Rock ia Ianuari, na tula’i mai ai loa ali’i fusu e to’afa ua latou umia fusi o aupaga eseese a le ASBF. O i latou ia e aofia ai Sui Palauni mo le aupaga a le middle weight; Malae Aumaga mo le aupaga a le heavyweight; Alofa Mata’afa mo le aupaga a le light heavyweight, ma Ofisa Talaimalo mo le aupaga o le super heavyweight,” o le saunoaga lea a Iese.
Ae talu ai o nai suiga laiti i filifiliga a ni isi o ali’i fusu, ua mafua ai ona avanoa isi fusi e lua, o le fusi lea a le middle weight, lea sa umia e Palauni, ma le fusi a le light heavyweight sa umia e Mata’afa.
“O fusi e lua ia ua avanoa, ua mae’a ona fa’amautu ali’i fusu e saili mai ai ni isi la te umiaina ia ufi. O le fusi o le middleweight lea o le a fufusu ai Ageki Fuimaono mai le No Fear boxing club, ma le ali’i o Pita Fanolua mai le Ghost Kombat boxing club, ae o le fusi o le light weight, o le a fufusu ai le ali’i o Marston Ma’a mai le No Fear boxing club ma Toeaso Jr Moetoto mai le Maliu Mai boxing club,” o le saunoaga lea a Iese.
O le siamupini o le aupaga a le heavyweight, le ali’i o Malae Aumaga mai le Mapusaga Fou boxing club, o le a ia fa’ataliina le lu’i a le ali’i o Johnny Banse mai le Pago Eagles boxing club, ae o le siampini a le aupaga o le super heavy weight ia Ofisa Talaimalo, o le a ia fa’ataliina le lu’i mai le ali’i o Robert Toilolo o le Ghost Kombat boxing club.
O le susuga a Banse na manumalo i lana fusuaga i le ulua’i ta’amilosaga a le King of the Rock 2 ia Ianuari na te’a nei, ae o le ali’i o Toilolo sa fai ma sui o Amerika Samoa i le ta’amilosaga a le World Boxing lea sa faia i Ausetalia i le masina o Aokuso 2015, ma ia manumalo ai i le pine apamemea.
E pei ona faamaonia mai e Iese, o le ta’amilosaga lona lua a le King of the Rock mo le faaiuga o le vaiaso nei, e le o fai paaga ai le ASBF ma le Matagaluega a Tupulaga Talavou, Tina ma Tama’ita’i a Amerika Samoa e pei ona i ai i le ulua’i ta’amilosaga ia Ianuari.
“O le fa’amoemoe mo le aso To’ona’i o le vaiaso nei, o lo o fa’atautaia lava e le ASBF, e le o galulue fa’atasi ai matou ma le Ofisa o Tupulaga Talavou (DYWA), o lea fo’i o lo o totogi e le ASBF le maota o le Pago Youth Center i Pago Pago e fa’ataunu’u ai le ta’amilosaga a le King of the Rock 2,” o le saunoaga lea a Iese.
Se tasi o ali’i fusu ua mataina le a’e o lana fusu mo Amerika Samoa i lenei vaitau, susuga Johnny Banse mai Pago Pago
[ata AF]