Na tatala lava le iloiloina e le Komiti So’ofa’atasi a le Fono Faitulafono o le Paketi a le Ofisa o Fa’atoaga a le malo, i le fesili na fa’atula’i e le afioga i le ali’i Senatoa ia Faletagoa’i Tuiolemotu, i fanua a tagata Manu’a o lo o lisi e le Ofisa o Fa’atoaga, pe mafai ona fa’amalamalama i le Komiti tulaga o nei lisi.
Na taua e le Faatonusili o le Ofisa o Fa’atoaga ia Lealao M. Purcell e fa’apea, e 3 aiga mai Manu’a o lo o lisi e le malo a latou fanua, mo le fa’amoemoe e fa’ato’a ai fa’atoaga mo atina’e.
O aiga e to’atolu e pei ona taua i totonu o le Paketi, e aofia ai le aiga o Tafao Li’o i Ofu ma Olosega, ma aiga e lua i le Faletolu e aofia ai le aiga o Letalu ma Filoiali’i Ale.
E $1,644 le totogi o le lisi a le malo ma Tafao i le tausaga, $7,050 mo Letalu, ae $9,754 mo Filoiali’i. E ese mai i lisi i Manu’a, e lua fo’i isi lisi o lo o faia i Aunu’u, lea e ta’i $1,000 o lo o totogi atu e le malo i le tausaga mo le aiga e tasi.
“O lisi i Manu’a, o nai aiga lava sa talosaga mai i le malo, mo se avanoa e mafai ai ona lisi e le malo a latou fanua e fa’atino ai atina’e tau fa’atoaga, lea fo’i na talia e le malo, ona o le manatu e fa’aaoga fanua a aiga nei e fa’ato’a mo fa’atoaga, ae maua ai fo’i ma le avanoa e maua ai nai fesoasoani tau tupe mo nei aiga e tausi ai fanau ma aiga”, o le saunoaga lea a Lealao.
O le auina atu o oloa i atunu’u i fafo ma le fa’amoemoe e maua mai ai se isi algatupe fa’aopoopo mo le malo, o se tasi lea o mataupu na fesiligia e Faletagoa’i i le taimi o le iloiloga, ae na saunoa Lealao e fa’apea, e ui e le o i ai ni oloa o lo o fa’amoemoe e auina atu i maketi i fafo mo le taimi nei, ae ua i ai lava nai aiga ua amata ona latou fa’agaioiina ni isi o tapenaga mo ni oloa e gaosi lava iinei e pei o le ‘chips’ lea e gaosi mai i le fa’i ma le talo, ma le fa’amoemoe e fa’atau lava i totonu o le atunu’u, ma maua ai isi alagatupe fou mo nai aiga fa’apea ai le malo.
O ni isi o fa’afitauli o lo o fetaia’i ma le atunu’u na mafai ona fa’aleo e afioga i Senatoa ia Lealao, o le mafua’aga e le taliaina ai aano vela o manu mai Samoa e fia aumai i le atunu’u, fa’apea ai ma le mafua’aga e le taliaina ai e le Ofisa o Fa’atoaga siaki a tagata ta’ito’atasi o loo avatu e totogi ai fa’atau, ae talia na o le tinoitupe.
Na fa’amanino e Lealao e fa’apea, se’i vagana lava aano o manu e pei o le moa ua mae’a ona fa’avela lelei o loo mafai ona aumai i Samoa, ae o isi aano o manu e pei o le povi po o le pua’a fo’i, e le o fa’atagaina e le Ofisa o Fa’atoaga a le malo tele, ona o puipuiga lava i ni isi fa’ama’i e ono mafai ona ulufale mai i le teritori.
I le mataupu o le le taliaina o siaki ae talia na o tinoitupe e pei ona fesiligia e le afioga i le ali’i senatoa ia LeAtualevao Asifoa, na taua ai e Lealao le leai o se fa’aiuga fa’apena a le Ofisa poo le malo o lo o i ai, ae foliga mai o se fa’aiuga lava sa faia e se tasi o tagata faigaluega a lona Ofisa, ma ua mae’a ona faia le fa’aiuga e fa’amalolo le tumau ai lea tama’ita’i.
Saunoa atili Lealao e fa’apea, o se tasi lea o auala e mafua ai ona tupu le lima tagovale o tagata faigaluega, ona o le manana’o e tete’e siaki ae talia na o le tinoitupe.