Na fa’amanino e le Taitaifono o le Komiti Soofa’atasi o le Paketi a le Fono Faitulafono, afioga Laolagi Fonoti Savali Vaeao i le Ta’ita’ifono o le Komiti Fa’afoe o le Ofisa o Turisi ia Tom Drabble, le tele o le sao o le Fono Faitulafono i le atina’e o pisinisi ma turisi i Amerika Samoa, ina ua pasia e le Senate i le vaiaso na te’a nei le pili a le malo e fa’aitiitia ai lafoga e totogi e pisinisi, lea fo’i o lo o galulue ai le maota o sui.
Na mafua ona fa’amamafa e Laolagi le mataupu e fa’atatau i le sao o le Fono i lana saunoaga, e fa’asa’o ai le fa’afinauga a le susuga a Drabble e fa’atatau i le leai o se taumafaiga a le malo e fesoasoani i pisinisi fa’apea ai ma le atina’e tau turisi.
Ina ua fesiligia e le afioga i le ali’i senatoa ia Tuaolo M. Fruean le Pulesili o le Ofisa o Turisi ia David Vaeafe, i se fuafuaga a lona Ofisa e fai pe afai e tau fai lolofi uma mai se vaega to’atele o turisi e fia nonofo i le atunu’u mo se taimi umi, ao lea e le o lava fale talimalo e mapu i ai turisi, na saunoa ai Vaeafe e fa’apea, e tatau ona tele ni faletalimalo i Amerika Samoa, ina ia mafai ai ona tali lea manaoga.
Ae na taua e Drabble e fa’apea, o le fa’afitauli o loo i ai nei, faigata ona ulufale mai pisinisi mai fafo e tatala ni a latou lala i le teritori, ona o le fa’afitauli i le maualuga o le lafoga o lo o totogi e pisinisi i le malo.
Na vave ona fa’auilavea Laolagi ma ia fautua ia Drabble e soia le tusitusilima, o lea lava o lo o galulue le faigamalo ma le Fono Faitulafono e saili auala eseese e fesoasoani ai i le atina’eina o pisinisi tua.
“O lea fa’atoa pasia atu e le Senate le pili sa talosagaina e le faigamalo e fa’aitiitia ai lafoga e totogi e pisinisi, o lo o galulue i ai le maota o sui, aua la le tusitusilima i le malo, ae tatou galulue e fesoasoani i fuafuaga uma a le malo e fa’aleleia ai le atina’e o le atunu’u atoa ai ma pisinisi”, o le saunoaga lea a Laolagi.
E ui i le tele o va’a meli na taua e Vaeafe i lana saunoaga o lo o afea Amerika Samoa i tausaga ta’itasi, peita’i na saunoa le afioga i le ali’i senatoa ia Magalei Logovi’i e fa’apea, e leai ma se turisi o lo o malaga mai i va’a meli nei o lo o nofo i Amerika Samoa mo se vaiaso atoa, se’i vagana ai le ta’i 8 itula lea e o mai ai ma feofeoa’i solo, ona toe fo’i lea e aunoa ma le sasa’a uma mai o le latou tamaoaiga ia Amerika Samoa, e pei ona faia e turisi mai isi atunu’u o le lalolagi i Samoa, e le gata e nonofo i faletalimalo mo le vaiaso pe sili atu fo’i, ae maua fo’i le avanoa e sasa’a ai lo latou tamaoaiga i le atina’e o le atunu’u ma pisinisi tua.
Ao taumafai Vaeafe e tau fa’amanino i luma o le Komiti Soofaatasi le taua o fonotaga o loo malaga atu ai i atunu’u i fafo, ona o le taumafai lava e fa’alauiloa Amerika Samoa i le lalolagi, ma fa’a faigofie ai ona fa’atosina mai turisi e malaga asiasi mai i le atunu’u, na saunoa Magalei e fa’apea, “poo a lava na mau taumafaiga e te fai mai ai, ae a leai lava se isi va’alele e lua ma le Hawaiian Air o lo o i ai, e le aga’i lava i luma le atina’e tau turisi”.
Ae na taua e le afioga i le ali’i faipule mai Manu’a #1 ia Vesi Talalelei Fautanu Jr e fa’apea, talu lava ona maua i ripoti a le Ofisa o Turisi le to’atele o turisi mai fafo ua malaga asiasi mai i le atunu’u, e le o mafai lava ona iloa tonu pe fia se tupe ua mafai ona maua e le malo mai le atina’e o turisi.