Ua tu’uina atu nei se fa’atonuga mai le Fa’atonusili o le Ofisa o le Paketi a le malo, i Fa’atonusili ma Fa’auluuluga uma o Matagaluega ma Ofisa a le malo, ina ia taofia le toe faia o ni isi siitaga i totogi atoa ai ma le toe fa’a faigaluegaina o ni isi tagata faigaluega fou i totonu, se’i vagana ua toe tu’uina mai se isi fa’aaliga.
I se tusi sa tu’uina atu e Catherine D. Saelua i sui uma o le Kapeneta a le ali’i kovana i le fa’aiuga o le masina na te’a nei, o lo o ia taua ai ni isi o fa’aiuga sa pasia i se fonotaga fa’apitoa sa faia a lona Ofisa, Ofisa o le tupe, fa’apea ai ma le Ofisa o le Kovana, i le taumafai lea e va’ava’aia i auala e fa’aititia ai le toe soona fa’aalu o tupe a le malo, ae ia mafai ona fa’atonutonu lona fa’aaogaina ina ia talafeagai ma le paketi ua mae’a ona pasia mo ofisa ta’itasi a le malo.
Saunoa Saelua i lana tusi e fa’apea, ao aga’i atu le malo i le Kuata lona tolu o lana tausaga tupe fou lenei 2016, e manaomia e le malo le tausisia pea o le fa’aaogaina o lana paketi ina ia mautinoa o lo o mulimulita’i i ala o le tulafono.
“O le ausia o se paketi paleni ma lelei, e mafua mai lea ina ua talafeagai le tulaga o a tatou tupe fa’aalu, fuafua fo’i lea i le tulaga o a tatou tupe o lo o maua mai, o le mafua’aga lena ua manatu ai ta’ita’i o le malo i se fonotaga sa faia, e ao lava ona tatou tausisia tulaga uma o le tulafono ina ia tulaga lelei la tatou paketi, e ala i le fa’atonutonu lea o tulaga o a tatou tupe fa’aalu”, o se vaega lea o le tusi a Saelua.
O ni isi la o vaega e pei ona moomia le taofia e aofia ai le taofia lea o le toe fa’a faigaluegaina o ni tagata faigaluega fou i totonu o ofisa eseese o le malo, e aofia ai ma le fa’a faigaluegaina o se tagata ina ia sui tulaga i se tagata faigaluega ua fa’amalolo.
Ua tafia fo’i le toe faia o ni siitaga i tulaga o totogi o tagata faigaluega i le taimi nei, po o le faia fo’i o ni fesuiaiga i totogi, se’i vagana ai tulaga i totogi fa’aopoopo (increment) ua pasia e le kovana le faia.
Ua taofia fo’i le toe faia o ni malaga i fafo e fa’aaoga ai tupe lotoifale, se’i vagana ai malaga mo Manu’a, ae mo le tulaga o mea e moomia i le fa’atinoina o galuega (supplies & equipment), o le a mafai ona talia ni talosaga mo ni oka e fa’atauina mai, pe afai o lo o talafeagai le mana’omia o nei oka mo le fa’atinoina o galuega a ofisa ma matagaluega a le malo.
Na taua e Saelua i lana tusi le taua tele o le galulue fa’atasi o ofisa uma o le malo i le fa’amalosia o lenei taumafaiga, ina ia mafai ai ona fa’atonutonu le tulaga o tupe faaalu, ae mafai ai ona fa’asao tupe maua a le malo e fesoasoani ai i ni isi o ana atina’e.