Tatou ave le faafetai i le Bluesky Communications i le fesoasoani mai i le tuuina atu o tala o le liki kirikiti o le Fu’a o lenei tausaga.
Ua fa’ailoa mai e le sui failautusi o le Ofisa o Mataupu Tau Samoa, Tuiagamoa Tavai, "E tatau ona tu'u atu i le vaiaso fou, e fai ai le suega siamupini i le liki kirikiti a tamaita'i, ae faia pea i le vaiaso nei suega siamupini a tane” faatasi ai ma le tulaga tolu ma le fa.
O le saunoaga a Tuiagamoa, ina ua ma’ea taaloga i le aso To’ana’i ua te’a, i le va o Teine o le I’a Vai mai Malaeloa ma Teine o le Asaga o Aunu’u.
Sa manumalo le I’a Vai i le 71 o ‘ai ae 62 ‘ai a Teine o le Asaga. Ma ua tutusa ai nei Teine o le I’a Vai ma Teine o le Asaga i le ta’i tasi le faiaina. Ana manumalo Teine o le Asaga i le aso To’ana’i ua maua ai le siamupani, ae peitai, o lea e tatau la ona toe taaalo ‘au nei e lua e saili ai le siamupini.
E le’i mautinoa tonu le aso o le vaiaso fou e saili ai le siamupini o le liki a tamaitaii.
I le taaloga o le aso To’anai, sa iloa lelei e Teine o le I'a Vai ia faate'a a le Asaga, tuu ia Aleluia ae o Akape, ua matua'i lelei lana te'a, lelei lana faatolotolo, lelei pe a sumu, toe lelei lana pa'u tasi, lea na tele ina pe-pe ai le 'au ta lelei a le I'a Vai.
Na o atu sauni lava le I'a Vai ma le latou malamala i te'a lea o loo faaaogaina e le Asaga, ae le popole tele i ai le teine o le I'a Vai, ua sauni lelei foi isi teine e taina 'ai i lea aso.
Ae e i ai le mea lilo a le I'a Vai, o le fesuia'i mai lea ole 'au faate'a, ma e toafa faate'a lelei na faaaoga mai e le I'a Vai: Fia, Tauia, Lela ma Melissa.
E lelei foi le talituaa a le I’a Vai ae maise le vaega sapo polo mamao, e pei o Filiga.
A'o le Teine o le Asaga, e numera tasi lava i le latou talituaa, o le laiti a teine a o le gaioi ia, toe lelei a latou sapo, e leai se mea e vaivai mai ai le 'au a le Asaga.
Na muamua ona ta-ta le I'a Vai, na amata lava e Jowella ma Winnie, lea na lavea le ta a Jowella maua ai ona 'ai e 9, ae tasi le 'ai a Winnie.
Na tula'i mai Tina e 14 ‘ai, ia ua te'i lava i le avea o ia ma Masiofo i lena aso, toe lelei ai le ta a Fia e 12 'ai, ia e pulinisese ai o ia i le taumafaiga mai o latou 'ai.
Ia na pito i ai Terry e 6, soso'o atu i ai Filiga ma Saua, Tauia e ta'i 5, ae tele foi le 'au vaega lea e le’i maua ni ‘ai. I totonu o le 'aufuamoa lena, e tele teine ta lelei a le I'a Vai.
O’o loa i le taimi na o ifo ai le Asaga, e tuli 'ai, o le fautuaga na fai i ai le latou faiaoga, le tofa ia Taufusi Ailao, “ia pe pe lava mai tamua, ona se'e lea o le tatou va'a i le malu o le aloalo.”
Na pe pe uma le tamua a le Asaga i le amataga, i le sapoina o ta a le faletua o Fatima, ma le 'olo o se teine o Fia.
I le sapo manaia a Winni lea toetoe lava a pau le polo, ae taumafai lava i luga, ma 'aapa i le polo na maua mai i ona tamatamalima e tolu.
O le isi sapo manaia lava a le teine o le Asaga, lea na tu tu mai i luga mai o le sami, e lavea le ta a le teine o le I'a Vai, faapea lava a le 'aumaimoa e leai se isi o i ai, ae tete'i i le kolosi 'ae o le teine na tuli mai le polo, sapo tamoe i luga toetoe a tofu atu i le sami le polo.
Ona tula'i mai lea o Ana lea na taina ona 'ai e 19. Sau le teine o Legalo, lea na taina 'ai e 14.
Ina ua ta-ta le masaga, tu la'i mai 'ai e faatoa 62 a Teine o le Asaga, ia na toe te'a mai loa ia Fia, pasasa i lalo le 'olo, malo ai loa le I'a Vai.
O le sapo manaia lava a le I'a Vai i lea aso, o le sapo a Filiga, e toetoe lava a oo le polo i lalo i le mutia, ae maua. Ma le sapo a Saua, na faaaoga le fatafata e fesoasoani i le sapoina o le polo, faapea foi le sapo a Lela, na solomuli i tua ina ua mao tua le sau o le se'e, na maua loa le polo ae patatu loa i lalo.
