O le isi fautuaga lea ua tu’uina atu e le to’atele o afioga i Faipule i le Pulega o le Falema’i a le LBJ i Fagaalu, o le fa’amaoni lea i le aoina mai o a latou aitalafu ua silia i le 5 tausaga o lo o i ai pea e le o mafai ona aoina mai i totonu.
O le ripoti a le LBJ lea ua taoto i luma o le maota o sui i le vaiaso na te’a nei, o lo o taua ai le faitau miliona ma miliona o tupe o lo o aitalafu ai le to’atele o le atunu’u i le falema’i, e ese mai ai aitalafu a le malo e silia i le $6.4 miliona, e mafua mai i tupe ua mae’a ona fa’atulafono e tatau ona totogi atu i le falema’i, peita’i e o o mai lava i le taimi nei o lo o i ai pea ia tupe e le o mafai e le malo ona totogi.
Saunoa le Pulesili o le pulega a le Falema’i o le LBJ ia Taufete’e John Faumuina e fa’apea, o le tele o aitalafu o lo o i ai i le falema’i i le taimi nei, o aitalafu ua silia i le ta’i 120 aso, ma o lo o galulue ai pea le aufaigaluega mo le aoina mai i totonu.
Saunoa atili Taufete’e i luma o le komiti o le soifua maloloina a le maota o sui i se iloiloga sa faia i le vaiaso na te’a nei e fa’apea, o le fa’afitauli numera tasi o lo o fetaia’i ma le falema’i, e le mafai ona fa’asa se tagata o lo o i ai sana aitalafu mai le alu atu e vaai le foma’i.
“O le tulafono lava ua tatou silafia uma, e leai se tagata e teena pe afai e sulu atu i le falema’i mo se fesoasoani, o le tiute a le falema’i, o le tausi ma puipui i le soifua maloloina o tagata uma”, o le saunoaga lea a Taufete’e.
Saunoa Legae’e Palepoi Mauga e fa’apea, o le isi lea fa’afitauli numera tasi o lo o mafua ai ona feagai le falem’ai ma fa’afitauli tau tupe, e le o lelei le aoina mai i totonu o aitalafu.
Saunoa le ali’i faipule e fa’apea, e le o se tulaga lelei i le atunu’u le uma ona latou taliaina o le auaunaga a le falema’i mo lo latou soifua maloloina, ona tula’i lea ma o ese e aunoa ma le totogi o se tupe e tusa ai o le tautua ua mae’a ona latou tauaaoina.
I faamaumauga mai le falema’i sa mafai ona tauaao atu i luma o le komiti a le maota o sui, o lo o taua ai le tele o se vaega o aitalafu ua silia i le ta’i 120 aso o lo o taumafai le falema’i e ao mai i totonu, atoa ai ma le taumafai lea ina aua ne’i toe i ai ni aitalafu e ova atu ma le ta’i 60 aso pe 90 aso fo’i o ta’atitia pea e lei aoina mai i totonu.
E ese mai i aitalafu o lo o nofo aitalafu ai le atunu’u ma le malo i le falema’i, ae o lo o i ai fo’i aitalafu a le falema’i i kamupani i fafo o lo o kiliva mai ai fualaau ma vailaau mo togafitiga, o lo o taumafai pea le falema’i e totogi fa’amae’a i le taimi nei.
Saunoa Taufete’e e fa’apea, talu ai o le tetele o aitalafu a le falemai i ni isi o kamupani o lo o sapalai mai ai vailaau ma fualaau mo togafitiga i tausaga ua mavae, ua le toe mafai ai ona toe aumai muamua uta o vailaau, se’i vagana ua totogi muamua le tupe ona fa’atoa mafai lea ona maua mai vailaau ma fualaau mo le atunu’u.
O se tasi o fautuaga sa tu’uina atu e le afioga i le ali’i faipule ia Larry Sanitoa i le komiti o le falema’i, o le talosaga lea i le malo mo se avanoa e mafai ai ona maua mai se vaega tupe mai le Pone a le malo lea ua mae’a ona fa’atau, e tau fesoasoani ai i le foiaina o le fa’afitauli tau tupe o lo o safa ai le falema’i i le taimi nei.