TUSIGA ATA A’OGA MAUALULUGA MO LE ‘CONGRESSIONAL ART’
Ua mae’a ona tu’ufa’atasia nisi o ata matagofie sa galulue ai nisi o sui mai A’oga maualuluga taitasi i lenei tausaga, ina ia fa’aulu mo le tauvaga a le Konekeresi a le Malo tele. Ua fa’ailoa mai fo’i, o ata ua mae’a fa’atutuina, o ata ia ua mae’a filifilia mai e pulega o Tusiga Ata mai a’oga maualuluga ua aofia i lenei tauvaga i lenei fo’i tausaga.
I le aotelega o galuega fa’atino sa fa’alauiloa ananafi i le Fale Laumei, ua va’aia ai fo’i ma le vasega o fanau a’oga sa latou tusia ma vali nei ata matagofie, fa’atasi ai ma sui ta’itasi mai a’oga maualuluga sa auai.
O le Ofisa o le Sui i Uosigitone Aumua Amata sa auai e fa’atautaia lenei fa’aaliga o Ata ua pikia mai a’oga ta’itasi mo le tulaga muamua se’ia o’o i le tulaga fa. Ua fa’ailoa mai fo’i, “O ata e tulaga muamua ma le tulaga lua, e maua le avanoa e fa’atautau ai mo le maimoaga a le mamalu lautele o galulue i totonu o le Ofisa Autu o le Konekeresi a le Malo Tele mo le tausaga atoa, peita’i o isi ata e fa’atautau lea mo le maimoaga i le tausaga atoa i totonu o le Ofisa o le tatou sui Faipule i le Konekeresi i le Laumua i DC.”
O ata na maimoaina o sao mai nisi o a’oga maualuluga e pei o le Voc Tech High, Fa’asao Marist, Samoana, Tafuna, Fagaitua ma Leone. Pe afai o le a maua mai le fa’aiuga o lenei tauvaga ata a le Konekeresi, o le a fa’ailoa atu sui ua agava’a ai, fa’atasi ma fa’ailoga e taua’aoina mo i latou.
O lenei ata matagofie sa tusia ma vali e le tama’ita’i o Jane Pelenato, o se tasi sa manumalo lana ata i le tausaga ua te’a. Ua o’o nei lana a’oa’oga i le vasega 12 i Nuuuli VocTech, ma taumafai fo’i lana ata mo se fa’ailoga i lenei tausaga.
[ata: Leua Aiono Frost]
MASII MAI 3 AU BASKETBALL SAMOA TAAMILOSAGA SISIGAFU’A
Ua talimalo le Asosi Basketball (American Samoa Basketball Association) i aumalaga e tolu ‘au ma fa’atonu ma faia’oga - o ‘au Basketball a teine, Au a Tama ma le Opens Men’s Team - mai Samoa Tuto’atasi, mo le ta’amilosaga Bassketball o le Sisigafu’a 2016.
O lenei aumalaga o lo’o talia i le Maliu Mai Beach Resort ma o lo’o latou fiafia lava ina ua mae’a ulua’i ta’aloga a le Au A Tama’ita’i, sa fa’amanuiaina lea i le latou ta’aloga ma le AS Under19 Girls Team. O latou ‘ai na manumalo ai e 43-39.
“E le o mamao ni ‘ai ae o le mea sili lava o le Manumalo,” o se tala lea a le tama’ita’i faia’oga o lea ‘au, Tala Pauga.
“Sa matou o mai uma lava i le va’alele, sa matou saili tupe lava ina ia mafai ona matou uia lea ala televave ma e tatau lava ona talia le vala’aulia na o’o atu mai lenei fo’i itu o le auuso i lea fo’i fa’agatama o le Basketball,” o se tala lea a le ali’i Faia’oga o le Au a tama Lafoga Paia.
E ta’ito’a 12 sui ta’a’alo o ‘au a tama ma le ‘au a teine fa’apea fo’i ma le Samoa Men’s Open team, lea fo’i o lo’o ta’ita’i mai e Vaioulu Tominiko i lenei tausaga.
O lo’o fa’agasolo pea ta’aloga fa’avaomalo.
VAVE TU’UA VOCTECH HIGH, FA’ATONUGA A LE DOH
Ona o tulaga o paipa vai i totonu o le umukuka sa fa’aletonu ma ua papa, sa mafua ai ona vave tu’ua le aoga maualuga a Nu’uuli VocTech i le aso Lulu o le vaiaso lenei.
O le vave tapunia o le aoga o se faatonuga lea mai le Matagaluega o le Soifua Maloloina.
Peita’i, ua fa’ailoa mai, ua mae’a toe fa’aleleia mea uma i totonu o le umukuka i ona ala paipa vai ma ua toe fo’i le a’oga i le taimi masani.