USUGAFONO EKALESIA SAMOA BAPTIST UNION
O le tausaga lenei ua usuia mai ai le fono a le Samoa Baptist Union lea ua so’ofa’atasi ai Ekalesia Papatiso i Amerika Samoa ma Samoa Tuto’atasi.
“O lenei usugafono a Samoa i ana Ekalesia Papatiso, e faia ta’i ono masina, ina ia sailia ma malilie fa’atasi fo’i le vasega o le Aufaigaluega i mataupu e ao ina talanoaina i a matou fonotele, lea o le a talimalo ai Samoa i le tausaga nei,” o se fa’apupulaga lea a le susuga Rev. Dr. Sosene Le’au, faife’au i le Ekalesia Emanuele i Leone, ma o lo’o aofia i lala o le Samoa Baptist i Amerika Samoa.
O le fonotele lea o le a tauaofia i Samoa e aotelega mai i ai usugafono a lala uma o le Ekalesia Papatiso i le lalolagi ma ua sauni fo’i le aotelega o Ekalesia Papatiso e lima i Samoa mo lea taligamalo, e tusa ai ma le fa’asoa mai a le susuga le Faife’au Toeaina Fa’apale Seupule.
Ona o lenei Ekalesia Aoso i le lalolagi, ua fai si leva ua mae’a fa’atuina le latou a’oga tulaga muamua i Amerika Samoa, le Samoa Baptist i Happy Valley, Tafuna.
E le gata ina i ai la lenei a’oga i le lotoa a lea Ekalesia, ae ua atoa le lua tausaga talu ona amatalia ai fo’i ma le a’oga fa’afaife’au iina. E to’a 10 A’oa’o ina ia soloa’i e avea ma Faife’au Papatiso i le lumana’i.
O se tasi lea o tofiga ua tu’uina atu e ta’ita’i ai le susuga le Faife’au ia Seupule, “Ua va’aia lava le televave o le fa’atinoina o lea itu o le tautua i lenei ono masina talu mai ona lu’ia i matou o Feagaiga, ina faatuputeleina le Ekalesia.”
O sui na malaga mai mo le usugafono e to’atolu faife’au ma latou faletua. E lua aso o lenei usugafono ma ua fa’ailoa mai e i latou, “Ua matou fiafia tele e maua lenei so’otaga ma le aufaigaluega totofi i lenei fo’i itu o Samoa. E tele fo’i le fesoasoani e maua e i matou mai uso galulue iinei e fa’aleleia atili ai fo’i le galuega i Samoa latou. O nisi o i matou e le’i leva ona masani, ma o se mea sili lea ua maia i lenei tausaga, o le masaniga o uso i le galuega, ia faia tiute ma faiva o le tautuaina o le Upu i ala e feso’ota’i lelei ai. Ia tasi le faiva, tasi fo’i le loto, ia tupu ma ola le galuega a le Atua.”
Ua fa’ailoa mai fo’i e nei ta’ita’i, “O nisi o mataupu autu lava ua mae’a talanoaina ma pasia e fa’aulu i le matou fonotele, ua aofia ai tulaga o taga tatau ma le mau a le Ekalesia i na aga. O le isi o le fa’amalosia lea o le faia o tiute fa’afailauga, o le fa’atutuina o Ekalesia Fou ma ia taumafai ina ia auai i latou e le o i ai se ekalesia o galulue i ai i o latou soifuaga, ia maua se fata faitaulaga e aga’i i ai ma tapua’i sa’oloto ai i le Atua Soifua.”
FOA’I ‘SOFIA I FANAUITI I LE FALEMA’I O LE LBJ
O le aso Lulu na o’o atu ai le Peresetene ma nisi o totino o le SOFIA ina ia latou faia se foa’i mo le fanauiti o lo’o fa’ata’otolia o latou gasegase i le falema’i tele i Faga’alu.
O le fa’atina o tama’ita’i tausima’i uma i le teritori Tofiga Tufele Li’amatua ma lona soa Simamao Muagututi’a fa’apea ma le pulega o le Pediatrics ia Laura ma Malo Harrington sa latou talia fa’aaloalo ma le agaga fa’afetai fo’i lenei foa’i e fa’aauala mai le SOFIA.
“Ona o lenei tausaga ua fa’ai’ui’u fo’i le tautua a le tama’ita’i lalelei o Erica Fonoti mo le SOFIA lea ua manatu ai, ina ia toe o’o tasi mai mo lana foa’i lenei fa’atasi ai ma le auuso i le SOFIA, e tau ina toe tapui ai lona agaga fia tautua pea i le fanauiti. Ae o le agaga moni o le fia pa’i atu se fa’amama avega i le fanau ae maise matua i le tausiga o gasegase o i latou a’o nofoia lenei itu o le tautua.” O se tala lea a le peresetene o le SOFIA.
Na tufatufaina latou meaalofa, ma sa va’aia fo’i le agaga fa’agae’etia o le fanau o lo’o tausiga gasegase ona o le agalelei.