Ua faamaonia mai e le Komiti Faapitoa o Tapenaga mo Tuuga Fautasi o le tuto’atasi a Samoa i le masina o Iuni o le tausaga nei, le mae’a lea ona tu’uina mai i se valaaulia le Sa o le afioaga i Leone, le Taema II ina ia auai atu i le tuuga fautasi fa’avaomalo a Samoa i lenei tausaga, ma fai ai ma sui o Amerika Samoa.
Ina ua fesiligia e le Samoa News le sui komesina o le Ofisa o Leoleo a Samoa, o ia fo’i lea o lo o ta’ita’i i le komiti fa’apitoa o tapenaga mo tuuga fautasi, afioga Fauono Talalelei Tapu i le vaiaso na te’a nei, sa ia fa’amaonia mai ai le mae’a lea ona tuuina mai o le tusi valaaulia mo le Taema II.
“Ua mae’a ona tuuina atu le valaaulia mo le Sa o le Taema II mai Leone, Amerika Samoa, e auai mai i le tuuga fautasi o le tuto’atasi a Samoa i lenei tausaga, ma fai ai i latou ma sui o Amerika Samoa, e o o mai lava la i le taimi nei (vaiaso na te’a nei), e lei tuuina mai lava se tali mai Amerika Samoa e fa’atatau i le valaaulia ua mae’a ona tu’uina atu i ai”, o le saunoaga lea a Fauono.
E lei finagalo le sui komesina e fa’alauiloa i le Samoa News le auala na filifilia ai e le Komiti le Sa o le afioaga i Leone e fai ma sui o Amerika Samoa, pau le itu sa ia fa’amaonia mai i le Samoa News, “O lea ua mae’a ona faia le fa’aiuga e fa’atatau i le valaaulia mai Amerika Samoa, ma ua sauni fo’i le komiti mo se tali e tusa ai o le valaaulia”.
Sa molimauina e le Samoa News i le vaiaso na te’a nei i Samoa, e le o i ai lava se ata vaaia o ni tapenaga a ni au va’a mo se tuuga fautasi o le tuto’atasi o lenei tausaga, e ui o lea ua toe fa vaiaso ona taunu’u lea i le aso e fa’amanatuina o le tuto’atasi, le aso 1 Iuni 2016.
“O lea ua toe fa vaiaso, ao lenei lava e lei mautu mai ni Sa e tausinio i le tuuga fautasi o lenei tausaga, talosia ia e sili atu le aofa’i o ni va’a e tausinio i lenei tausaga nai lo le tausaga na te’a nei, lea e na o le 5 Sa sa tausinio, ae afai e faamaonia mai le Sa o le Taema II mai Amerika Samoa, lona uiga o le a tele isi Sa e fia auai i le tuuga”, o le saunoaga lea a Fauono.
Na faamaonia mai e se sui o le Ofisa o le ali’i kovana ia Lolo Matalasi Moliga le i ai o le valaaulia mai Samoa ua taunu’u mai mo se Sa e malaga atu i le latou fu’a, peita’i e lei mafai ona fa’amaonia mai po o le Sa a le Taema II lea ua sauni e malaga i Samoa.