O polokalame eseese ua fa’atulaga e le pulega a le Falema’i o le LBJ i Faga’alu faapea ai le Matagaluega o le Soifua Maloloina a le malo i lenei vaiaso, ua fa’amoemoe e aloaia ai le tautua le fa’alogologo tiga a Tausima’i, ao avea ai lenei masina e fa’atauaina ai la latou tautua i le atunu’u.
I le autu ai o le vaiaso fa’apitoa lenei mo galuega Tausima’i i le autu, “Aganu’u o le Saogalemu”, na sainia ai e le afioga i le Kovana le tumau o le atunu’u i le vaiaso na te’a nei se poloaiga fa’alaua’itele, e aloaia ai le tautua mo galuega Tausima’i i totonu o Amerika Samoa i lenei tausaga.
Na taua e le afioga a Lemanu Peleti Mauga e fa’apea, mai le silia i le 3.1 miliona le aofa’i o Tausima’i ua mae’a ona lesitalaina i totonu o Amerika, pe tusa ma le to’a 150 o i latou nei o Tausima’i ua laisene ma lesitalaina i totonu o Amerika Samoa, ma, o lo o latou tautuaina le soifua maloloina o le atunu’u i aso uma.
Saunoa Lemanu e fa’apea, ao galulue ai le Asosi o Tausima’i i Amerika Samoa e fa’alauiloa la latou tautua i le atunu’u e ala i le tausiaina lea o le soifua maloloina o tagata uma, o le tiute o le malo ma tagata uma o Amerika Samoa, o le aloaia lea ma fa’afetaia la latou tautua.
“O lo o fa’aauau pea ona moomia ni Tausima’i e a’oa’oina ma laisene ina ia mafai ona latou fa’aauauina lenei tautua taua ma le aoga mo Amerika Samoa, ma, i le maualuga ai o le auaunaga o lo o fa’atinoina e Tausima’i, e tatau ai i le atunu’u atoa ma ona tagata ona latou lagaolagoina le sao a Tausima’i i soo se taimi”, o se vaega lea o le poloaiga fa’alaua’itele na sainia e Lemanu i le vaiaso na te’a nei.
I le avea ai o le vaiaso muamua lenei o Me ma vaiaso fa’apitoa e fa’atauaina ai ma aloaia le tautua a ali’i ma tama’ita’i Tausima’i i Amerika Samoa, ua talosagaina ai e Lemanu le atunu’u atoa i ona ta’ita’i fa’alemalo fa’apea ai ta’ita’i fa’aleaganu’u, ina ia tutu fa’atasi mo le lagolagoina o le vaiaso taua mo Tausima’i, e pei ona fa’amanatuina ai i Amerika Samoa ma le lalolagi atoa.
O le aso 1 e oo atu i le aso 7 o Me, 2016 ua avea ma vaiaso faapitoa mo Tausima’i i lenei tausaga.
O se sauniga lotu faapitoa sa faia i le malumalu o le Ekalesia EFKAS i Matu’u i le aoauli o le aso Sa na te’a nei, lea sa tatala aloaia ai lenei polokalame, ma sa fa’atumulima i le mamalu o le Asosi o Tausima’i, fa’apea ai uo ma aiga, atoa ai ma ta’ita’i o le malo.
O ni isi o polokalame ua fa’atulaga mo lenei vaiaso a le Asosi o Tausima’i, e aofia ai la latou sauniga faapitoa e aloaia ai i latou ua loa tausaga o tautua i le galuega fa’a Tausima’i, lea ua fa’atulaga e faia lea i le taeao o le aso Lulu o le vaiaso nei.