E to’a 6 sui o le Asosi Siisii U’amea mamafa a Amerika Samoa ua mae’a ona filifilia, e fai ma sui o le atunu’u i le ta’amilosaga a le Oceania, lea e tali malo ai le atunu’u o Fiti i le fa’aiuga o le masina nei, amata atu i le aso 23-28 o Me, 2016.
O sui e to’a 6 ua filifilia e aofia ai tama’ita’i e to’atolu fa’apea ai ma ali’i e to’atolu.
O tama’ita’i e to’atolu e aofia ai Orepa Talo, Jennade F. Ausage ma Monica Afalava, ae o ali’i e aofia ai Malaki Sitagata Jr, Tanumafili Malietoa-Jungblut, ma le ali’i fou e to’atasi ia Li’amatua Tufele Jr.
Na fa’ailoa mai e le faiaoga o le ausiisii, tofa Tomane Lopesi Fa’agu i se fa’atalatalanoaga ma le Samoa News e fa’apea, e to’alima sui o le ausiisii o le a malaga atu mai Amerika Samoa, ma feiloa’i ai ma le sui e to’atasi o lo o koleni i Niu Kaletonia i le taimi nei, le susuga a Tanumafili, ao lumana’i ai le aso o le tausinioga.
“O tapenaga a le ausiisii i le taimi nei ua matua atoatoa ma lelei, ua molimauina fo’i le si’itia i luga o le tulaga ua i ai le mamafa o a latou si’i, fa’atusatusa lea i le tulaga o lo o i ai le mamafa o sii a isi tagata siisii mai le Pasefika, ou te talitonu atoatoa fo’i, o le a manuia taumafaiga a le au a le atunu’u i le fa’aiuga o le masina nei,” o le saunoaga lea a Tomane i se fa’atalatalanoaga ma le Samoa News.
O le tulaga mataina e pei ona i ai taumafaiga a le susuga ia Tanumafili i le taimi nei, ua sili atu i le tulaga sa i ai le maualuga o lana si’i i le ta’amilosaga a le Oceania i Papua Niu Kini i le tausaga na te’a nei.
“O le susuga ia Tanumafili sa pine auro i le ta’amilosaga lea sa faia i Ausetalia i le masina o Novema 2015, ma o se tulaga lelei lea mo lana tapenaga i le ta’amilosaga a le Oceania i Fiti, atoa ai ma le tau sailiina lea o sona avanoa e tausinio ai i le ta’amilosaga o le Olimipeka i Brazil i le tausaga nei,” o le isi lea saunoaga a Tomane
I le tulaga ua i ai tapenaga a le au mo Fiti, o lo o maualuga le talitonuga i le mafai lea ona maua e le ausiisii a le atunu’u pine mai Fiti, e pei ona latou manumalo ai i pine i le tele o ta’amilosaga e tausinio ai i latou.
O le ta’amilosaga a le Oceania i Papua Niu Kini i le tausaga na te’a nei, na maua ai e le ausiisii a le atunu’u pine e 8, e aofia ai le pine auro e tasi, lua pine siliva, ma pine apamemea e 5.
O le pine auro na maua e le tama’ita’i o Talo, lea ua toe sauni atu e tausinio i le aupaga o le 105kg i le vaega a le Youth Championship.
O le tamaitai o Ausage e tausinio i le aupaga o le 75kg, ma le tama’ita’i o Afalava e tausinio i le aupaga o le 105+kg i le vaega a le Senior Championship.
I le vaega o ali’i, o Sitagata Jr e tausinio i le aupaga o le 105kg i le aupaga o le Youth Championship, o Tanumafili e taunu’u i le aupaga o le 105+kg i le aupaga o le Senior Championship, ma le ali’i o Tufele Jr e taunu’u i le aupaga o le 75kg i le Youth Championship.