E itula atoa na tuai ai le tatalaina o galuega masani a le maota o sui i le taeao ananafi, ona sa tau saili mai ni isi o faipule e fa’aatoa ai le numera e mafai ai ona tauaofia le maota mo ana galuega masani, aemaise ai o le taumafai ina ia atoa le numera o palota e pasia ai tofiga a le kovana mo le susuga ia Robert Ho Chee, lea ua tofia e avea ma ulua’i Komesina o le Ofisa o Nofoaga Teuga Tupe mo le Faletupe a le malo.
E na o le to’a 10 faipule sa i ai i le taimi e masani ona amata ai galuega a le Fono i le itula e 10:00 i le taeao ananafi, ona taumafai ai loa lea o le afioga i le Sui Fofoga Fetalai ia Fetu Fetui Jr e fa’afeso’ota’i ni isi o faipule i luga o le telefoni, ina ia aga’i mai i le fono ina ia mafai ai ona fa’ataunu’u galuega a le maota.
O le isi ali’i faipule e to’atasi sa i ai o ia i se tasi o sauniga o maliu, ae na ia tuua le sauniga ae toe fo’i ane i le tauaofiaga a le maota, ina ua talosaga lona o o ane e fa’aatoa ai le numera o sui e mafai ai ona nofoia le maota.
E ta tonu loa le itula e 11:00 ae tula’i loa le afioga i le fofoga fetalai mo le amataina o le tauaofiaga a le maota, ae ina ua mae’a le tatalo ua faia le tauvalaauga, ae fa’atoa ulufale loa lea o isi faipule to’atolu, o i latou ia e talitonu le Samoa News sa fa’ataotolia i gasegase o le tino, ae na toe fa’amalolosi atu lava ona o le fa’atauanau ane o le sui fofoga fetalai ina ia oo atu e fa’aatoa le numera o sui e mafai ai ona fa’atino galuega a le maota.
Na taua e se tasi o faipule e faapea, e le tatau lava ona tula’i mai ni tulaga fa’apenei i le fono faitulafono, o le tau saili mai lea o faipule e fa’aatoa ai le numera o sui e mafai ai ona fa’atino galuega a le maota.
Sa ia taua atili fo’i e fa’apea, e le afaina lava afioga i faipule o lo o fa’ataotolia i gasegase o le tino, po o faipule fo’i o lo o malaga i fafo i talavai ma sailiga fofo, ae mo faipule o lo o avanoa ae le o auai atu i le fono, i lona talitonuga, e le tatau ona tula’i mai lea tulaga fa’aletonu
Sa ia taua fo’i le tula’i mai o le fa’afitauli lenei i le aso Faraile o le vaiaso muamua na toe a’e mai ai galuega a le fono, ae o le aso fo’i lea na toe malolo ai galuega a le fono mo le 3 vaiaso, ina ua le atoa le numera o faipule e mafai ai ona fa’atino galuega a le maota.
O faipule sa i ai e aofia ai Fetu Fetui Jr, Puletiumalo D. Koko, Faimealelei Anthony Fu’e Allen, Vaetasi Tuumolimoli Sane Moliga, Puleleiite Li’amatua Tufele, Mulinuu Manea Filo Maluia, Sua Elisara Talaimatai, Larry Sanitoa, Su’a Alexander Eli Jennings, Toeaina Faufano Autele ma Vailoata Eteuati Amituana’i, Vesi Talalelei Fautanu Jr, Vui Florence Vaili Saulo, Atalina Asifoa ma le afioga i le Fofoga Fetalai ia Savali Talavou Ale.