Ua toe 2 nei vaiaso o lo o totoe ona auina atu loa lea o le aufusu a Amerika Samoa e tausinio i le ta’amilosaga o le a faia i Samoa i le vaiaso o le Teuila, lea o le a tausinio ai aufusu a Samoa e lua i le Ipu o lo o umia e le aufusu a Samoa i le taimi nei.
I se fa’atalatalanoaga ma le Faiaoga o lo o gafa ma le koleniina o ali’i fusu mai le Kalapu Fusu a le Maliu Mai, o ia fo’i lea o le faiaoga mo le Asosi Fusu a le American Samoa Boxing Federation (ASBF) ia Sala Sanele Etuala, sa ia taua ai le lava tapena o le aufusu a le atunu’u mo le aga’i atu e lu’i le Ipu a le Palemia lea o loo umia e Samoa.
“O le ta’amilosaga fa’avaomalo i le va o Samoa e lua sa faia i le masina o Iuni na te’a nei, na malaga atu ai le aufusu e to’a 7 mai Amerika Samoa nei, e puipui le Ipu a le Palemia sa latou umia, ae i le mae’a ai o se ta’amilosaga mataina ma le matagofie, na faiaina ai Amerika Samoa i ‘ai e 3-4, ma manumalo ai loa le aufusu mai Samoa i le Ipu”, o le saunoaga lea a Sala.
O manumalo e 3 a Amerika Samoa na maua mai lea i le ali’i Peter Fanolua, Toeaso Moetoto ma Paofe Seeti, o sui uma ia mai le Maliu Mai boxig club, lea o lo o i lalo o le va’ava’aiga a Sala.
Ina ua fesiligia po o a ni tapenapenaga a le ASBF ua faia ina ia toe manumalo ai i le fusuaga o le Teuila ua tapena atu nei i ai, na taua e Sala le ave o le fa’amuamua i le tapenaina o le malosi, ia lava le manava, ma ia lelei fo’i tapenapenaga a tama fusu mo lenei fa’amoemoe.
“O lea ua 3 vaiaso talu ona toe amata fusuaga fa’agasolo a le ASBF i fa’aiuga o vaiaso ta’itasi, e saili ai se ‘au lelei e fai ma sui o le atunu’u, ma ua vaaia fo’i le tau fai lelei uma o ali’i fusu o lo o tausinio i le sailiina o so latou avanoa e auai i le ‘au, talosia ae i’u manuia le fa’amoemoe a le ASBF i lena masina”, o le saunoaga lea a Sala.
O le vaiaso na te’a nei i le Maliu Mai Beach Resort i Fogagogo na fa’ataunuuina ai le ta’amilosaga lona 3 a le ASBF, mo le fa’alauiloaina lea o a latou fusi e fa o lo o fa’ata’amilo i totonu o le atunu’u, mo le sailia o ni isi latou te umiaina.
O le ulua’i ta’amilosaga e fa’aaoga i ai fusi nei e 4 na amata mai i le masina o Ianuari 2016, sosoo ai le ta’amilosaga lona 2 sa faia ia Me, ma le ta’amilosaga lona 3 lea na fa’ataunu’uina i le masina lenei o Aokuso.
Na taua e le afioga i le Sa’o Fetalai ia Sala e fa’apea, o le taua o ta’amilosaga a le ASBF o lo o fa’agasolo ai fusi e 4, e maua ai e tama fusu le avanoa e tausinio ai ina ia avea ma siamupini o aupaga ta’itasi, ma atili ai lava ona lelei lana tapenaga mo isi ta’amilosaga o lo o mulimuli mai”, o le saunoaga lea a le ali’i faiaoga ia Sala.
E 9 paga sa fa’agasolo i le ta’amilosaga lona 3 a le ASBF, e aofia ai paga amata e 5 atoa ai ma paga fa’apitoa e 4 sa lu’iina ai fusi a aupaga ta’itasi.
O ulua’i paga amata na molimauina ai le a’e o le ta’aloga fusu i le atunu’u, ina ua molimauina e le to’atele o le atunu’u ali’i talavou e ta’i 11 tausaga le matutua na tatalaina fusuaga o le po, le tele o le tomai ma le iloa ua mafai ona la mauaina e fa’atatau i le ta’alosaga o le fusu.
O le ali’i o Poueta Tafa mai le kalapu a Mapusaga Fou ma Ioelu Etuale mai le kalapu fusu a le Maliu Mai na tatalaina fusuaga o le po, lea na manumalo ai Etuale i le fa’aiuga o le fusuaga.
O le paga lona 5 i lea po, o le paga lea a tama’ita’i, lea na fusu ai Sandra Kitiona ma Aireen Afoa i se fusuaga mata’utia ma le manaia, ae i le fa’aiuga o lea fusuaga, na manumalo ai le tama’ita’i o Kitiona.
Na fa’alauiloa e le Sui Peresetene o le ASBF ia Okesene Malala le sauni o le ASBF e tapena se fusi e tausinio i ai vaega o tama’ita’i, ina ia avea ai lenei ta’aloga o se ta’aloga e to’atele tama’ita’i o le atunu’u e fiafia i ai.
O le fusuaga i le va o Kitiona ma Afoa i lea po, sa molimauina ai le lava tapena o i laua i le fa’atinoina o le ta’aloga, se’i vagana ai le manava o lo o moomia le fa’aleleia.
O le ulua’i paga faapitoa o le po na lu’i ai e le ali’i o Luluga Tauta le fusi o le middle weight o lo o umia e le ali’i o Fanolua, o le isi lea na manumalo i fusuaga sa faia i Samoa i le masina o Iuni na te’a nei. Na tau fai vevela itu e luai le ta’amilosaga muamua, ae ina ua oo atu i le ta’amilosaga 2 ma le 3, na vaaia ai loa iina le malosi o le ali’i o Fanolua, e ala i osofaiga sa mafai ona ia fa’atinoina i totonu o le mae’a, ma le mafai ai e Tauta ona saili se avanoa e osofa’i mai ai.
Na toeititi lava a le mafai e Tauta ona fa’amae’a le ta’amilosaga mulimuli o le la fusuaga, ina ua maua taitaia lelei o ia e Fanolua i le tulimanu, peita’i e aga’i atu loa le Laufali o le a taofi le fusuaga ae tatagi loa ma le logo ua mae’a le ta’amilosaga, ma tu’uina atu ai e ali’i fa’amasino le manumalo ia Fanolua.
O le paga fa’apitoa lona lua na lu’i ai e Tele’a Leo le fusi o le light middleweight o lo o umia e Moetoto, o le isi lea ali’i na manumalo i fusuaga sa faia i Samoa i le masina o Iuni. Na matua mataina le fusuaga i le va o Leo ma Moetoto, ina ua naunau mai le ali’i o Leo na te fia umia le fusi o lo o umia e Moetoto, ae i le fa’aiuga o le fusuaga, na tu’u atu ai e fa’amasino le manumalo ia Moetoto na te toe umia ai le fusi.
O fusi e 2 na mulimuli mai ai, sa lei mafai e ali’i e to’alua sa la umia ia fusi ona ausia le maualuga o pauna e fusu ai i a la aupaga, ma faia ai loa le fa’aiuga a le ASBF e fa’aleaoga le umia e i laua o ia fusi, ae tatala atu loa le avanoa i isi ali’i o aupaga ta’itasi ia latou te lu’iina fusi.
O le fusi o le heavy weight lea sa umia e Malae Aumaga, na ta’aalo ai Lalau Faumui ma Iki Pasefika e saili se isi na te mauaina lea fusi, ina ua le ausia e Aumaga pauna e tatau ai ona ia tausinio i le aupaga lea.
Na matua finau malosi le ali’i o Faumui i lona fia mauaina o le fusi, peita’i na fa’aaoga e Pasefika lona tomai mai fusuaga fa’avaomalo sa fai ai o ia ma sui o Amerika Samoa e finau ai fo’i i le fusi, ma ia manumalo ai i le fa’aiuga o le la ta’aloga.
O le fusi lona 4 o le super heavyweight lea sa umia e le ali’i o Ofisa Talaimalo, na ta’aalo ai Mano Mano ma Paofe Seeti. O le ali’i o Seeti le isi ali’i na manumalo i fusuaga sa faia i Samoa.
O le tomai ma le malosi o le ali’i o Seeti, o ni isi ia o vaega sa fesoasoani ia te ia i le la fusuaga ma Mano, ma i’u ina ia manumalo ai i le fusi.
O le masina fou o Setema pe a mae’a mai le ta’amilosaga o le Teuila i Samoa, o le a fa’ataunu’uina ai le vaega lona 4 o le ta’amilosaga o fusi a le ASBF.
Le ali’i o Paofe Seeti, lea ua ia umia nei le fusi o le super heavyweight.
[ata AF]