E ui o lea ua mae’a ona fa’ataunu’u le iloiloga a le maota o sui ma le Komesina o le Ofisa o Leoleo i le vaiaso na te’a nei, e fa’amalamalama ai ni isi o mataupu sa atugalu i ai finagalo o ni isi o Faipule, peita’i ua toe talosagaina e ni isi o afioga i Faipule le tatau lea ona toe fa’atulaga se isi iloiloga ma le ali’i Komesina, se’i fesiligia ai o ia i se fuafuaga a lona Ofisa i auala e foia ai le tele o fa’afitauli sa ia fa’aalia i le ulua’i iloiloga, e pei o le le lava lea o Leoleo e tautuaina le atunu’u, atoa ai ma le maualalo o totogi o Leoleo o lo o i ai.
Na taua e le Sui Fofoga Fetalai o le Maota o Sui ia Fetu Fetui Jr i le taimi o le iloiloga ma le Komesina o Leoleo, le tele o fa’asea mai ni isi o Leoleo o le atunu’u ua taunu’u atu i lona Ofisa, e fa’atatau i le le lava o Leoleo e fa’atinoina le galuega o le tautuaina o le atunu’u, to’atele isi Leoleo ua fa’amavae, atoa ai ma le maualalo o totogi o lo o maua e se vaega to’atele o Leoleo.
“O ni isi o taimi e fai ai la’u asiasiga i luga o le auala, ma ou molimauina ai le to’a laiti o Leoleo o lo o fa’atinoina le galuega, ma ua ou manatu ai loa, e le iloa po o le isi lea mafua’aga ua ala ai ona tau leai ni Leoleo i luga o le alatele, ona ua to’atele Leoleo ua fa’amavae”, o le saunoaga lea a Fetui Jr.
Saunoa atili le afioga i le ali’i faipule mai Manu’a #1 ia Fetui Jr, o se tasi fo’i sa avea muamua ma Leoleo o le malo e fa’apea, e na o Leoleo lava o lo o ti’eti’e i pasika o lo o ia vaaia pea lava i luga o le alatele i le taimi nei. Na fa’ai’u le saunoaga a Fetui Jr i lona tu’uina atu lea o se fautuaga i le ali’i Komesina o Leoleo, ina ia silasila toto’a i se auala e si’i ai totogi amata o Leoleo.
Na ioeina e le afioga Save Liuato Tuitele le finagalo o Fetui Jr e fa’atatau i le le lava lea o Leoleo o lo o fa’atinoina le tautua i le atunu’u, pe a fa’atusatusa i le tulaga ua fa’atupulaia ai le faitau aofa’i o le atunu’u, aemaise ai o le tele o ta’avale afi ua molimauina i luga o le alatele a le malo.
Na fa’ailoa atili fo’i e Save i afioga i faipule, e to’a 13 Leoleo ua fa’amavae mai a latou galuega, ona o mafua’aga eseese e fa’atatau i le sailiina lea o manuia mo aiga i atunu’u i fafo, atoa ai ma tulaga o talavai mo matua ma aiga, ae leai se Leoleo na fa’amavae ona o le maualalo o totogi po o tulaga fo’i i le le totogiina o ova taimi e pei ona taua ripoti o lo o salalau i le atunu’u.
Na fa’ailoa e Save e fa’apea, e to’alua i si Leoleo ua fa’amavae ona ua aga’i atu i laua e tautua i vaega ‘au a le militeli, o le isi Leoleo e to’atasi ua fa’amavae ona ua maua lana galuega i le Ofisa o le Pulega o le Eletise ma le Suavai a Amerika Samoa (ASPA) ona e maualuga atu le totogi, peita’i o lea ua filifili e malaga ma lona aiga i Alaska.
O le isi Leoleo e pei ona saunoa Save, na fa’amavae ona ua manatu e malaga i fafo e fesoasoani i lona to’alua i le tausiga o ona matua, ma le isi ali’i leoleo e to’atasi e le i leva ona fa’amavae atu, ona o ni isi o mafua’aga fa’aleaiga, ma fautuaina ai loa lea ali’i leoleo sa sili ona fa’atuatuaina i lana galuega ina ia fa’amavae mai le galuega, ona ua tau a’afia lana tautua e mafua mai i fa’afitauli o lo o tutupu i le va o ia ma lona aiga.
“Atonu o le talitonuga lea o le atunu’u o lo o i ai i le taimi nei, ua mafua ona fa’amavae le to’atele o Leoleo ona o tulaga fa’aletonu i totogi, atoa ai ma le le totogiina o latou ova taimi, ae o ia mafua’aga uma e le i ai ma se mea o taua i totonu o a latou tusi fa’amavae”, o le saunoaga lea a Save.
Ina ua fesiligia o ia e Faipule pe talitonu o lo o maualalo totogi o Leoleo, na saunoa Save, “O se tasi lena o mataupu o lo o tula’i mai i le taimi nei, o le maualalo lea o totogi o Leoleo, ae o lo o matou taumafai pea e fa’atino auala uma e si’itia ai totogi o Leoleo”.
I le taumafai ai ina ia fa’aopoopo ni isi Leoleo e galulue i le tautuaina o le atunu’u, na taua ai e Save le i ai o se fuafuaga mo le toe faia lea o se isi Vasega mo Leoleo fou i se taimi o i luma, ina ia fesoasoani ai i le fa’afitauli o le le lava o Leoleo o lo o i ai, lea o lo o latou galulue fa’atasi ai ma le Matagaluega e Fuafuaina Auala foia ai Solitulafono (CJA), aemaise ai o le fa’atupeina o se auaunaga fou e fa’a faigaluega ai ni Leoleo fou se to’a 10 i lalo o se polokalame fa’apitoa e taua o le (Community Oriental Policing Services - COPS).
I luma o le maota o sui i le taeao nei, na fa’ailoa ai e ni isi o afioga i ali’i Faipule le tatau lea ona toe fa’atulaga se isi iloiloga ma le Komesina o Leoleo, mo le fa’ailoaina mai o ni auala ua ia sauni e fa’atino e foia ai nei fa’afitauli, aemaise lava tulaga i si’itaga i totogi o leoleo, atoa ai ma le polokalame e toe fa’a faigaluega ai ni isi Leoleo fou.
Saunoa Fetui Jr e fa’apea, o lea ua taoto i luma o le Fono Faitulafono le paketi a le malo mo le tausaga tupe fou 2017, o lo o atagia mai ai i le paketi a le Ofisa o Leoleo le to’atele o Leoleo o lo o i lalo i le ta’i $11,000 o latou totogi i le tausaga, fa’atusatusa i le faigata ma le taua o le latou galuega o lo o faia.
I le paketi a le Ofisa o Leoleo, o lo o taua ai totogi mo ni isi o Leoleo, Fuimu ma Leoleo o le toese i Tafuna i le aofaiga e $10,791.00 i le tausaga.
Ae na taua e le afioga ia Mulinu’u Filo Maluia e fa’apea, e tatau fo’i ona fetaui le maualuluga o totogi o i latou o lo o i luga, ma totogi o Leoleo o lo o i luga o le laina i le ao ma le po, aua le tautuaina o le atunu’u atoa ai ma le puipuia o le tulafono.
“E le fesiligia le agava’a o i latou ua avea ma ta’ita’i, atonu fo’i ua talafeagai o latou totogi, fuafua i le tautua ma le agava’a, ae tatau fo’i ona silasila toto’a le malo i totogi o i latou o lo o pau i ai le mamafa o le galuega, o i latou fo’i nei o lo o fetaia’i ma fa’afitauli atoa ai ma amioga a le atunu’u i soo se taimi e tutupu ai fa’afitauli”, o le saunoaga lea a Maluia.