Ua taoto i luma o le maota maualuga a le Senate se fautuaga mai le afioga i le Loia Sili a le malo, le tofa a Talauega Eleasalo Ale, e tusa ai o le tulafono taufa’aofi lea o loo i luma o le maota maualuga a le Senate, lea e mafai ai ona tu’u atu pemita mo tagata mai fafo e ulufale mai ai e aooga i le Kolisi Tu’ufa’ataasi a Amerika Samoa.
Na taua e Talauega i luma o le maota maualuga i se latou feiloaiga i le vaiaso na te’a nei e fa’apea, e taua le tulafono e mafai ai ona tatala le avanoa i tagata mai fafo e ulufale mai ai e aooga i Amerika Samoa nei, e le gata i lea, ae maua ai fo’i vaega tupe fa’aopoopo mo le malo o Amerika Samoa, peita’i o nai vaega e moomoomia le toe faia i ai o ni teuteuga, ina ia manino lelei le tu’u atu o le malosi i le Loia Sili na te iloiloina ai pemita ma faia le fa’aiuga po o ai e tatau ona tu’u atu i ai pemita.
“E tusa ai o le gagana o le tulafono o lo o i ai, e le o i ai se malosi o tu’uina atu i le Loia Sili na te faia ai le fa’aiuga mulimuli po o ai e tu’u atu i ai pemita, ona o le auala o lo o tusia ai le tulafono, o lo o atagia mai ai, a uma ona iloilo e le Loia Sili talosaga, ona aumai fo’i lea i luma o le Fono Faitulafono e iloilo ma fa’amaonia atu ai, lona uiga la, e le o i ai se malosi o le loia sili na te faia ai le fa’aiuga mo le pemita”, o le saunoaga lea a Talauega i luma o le maota maualuga.
Na fesili le affoga i le ali’i senatoa ia Galea’i M. Tu’ufuli, o ia lea sa fa’aulufaleina le tulafono, pe i ai ni isi teuteuga e finagalo le loia sili e tu’uina atu ina ia fa’amalosi atili ai le tulafono, ae na saunoa Talauega e faapea, o lo o lelei atoatoa le tulafono, se’i vagana ai le vaega lea e tu’u atu ai le malosi i le Loia Sili na te faia ai le fa’aiuga.
Na fa’ailoa atili e Talauega i luma o le maota maualuga e fa’apea, afai e finagalo le fono e tu’u uma atu le malosi i le loia sili na te faia ai faaiuga mo le mataupu i pemita, lona uiga la, e le tatau ona toe i ai se vaega a le Fono Faitulafono e fesiligia ai pe iloilo tusi talosaga a tagata mo ni pemita, ae afai o le finagalo o le Fono Faitulafono e tatau fo’i ona i ai so latou sao i le iloiloina o tusi talosaga mo pemita, o lana fautuaga la, e tatau ona toe sui le gagana o le tulafono ina ia aua ai ne’i toe fa’apea e tu’u atu le malosi i le loia sili na te faia ai fa’aiuga.
E tele ni isi o fesili sa fia malamalama i ai afioga i senatoa e uiga i lenei tulafono, aemaise ai lava le tulaga o le puipuia lea o Amerika Samoa mai le avea ma nofoaga e lolofi mai i ai tagata eseese mai fafo e aooga ai, ae saili ai avanoa e mafai ai ona nonofo mau i Amerika Samoa.
Saunoa Magalei Logovi’i e fa’apea, o le popolega o lo o ia te ia, ina ne’i sau le tagata mai fafo e aoga i Amerika Samoa i lalo o le pemita aoga lea, ae avea ma auala e fa’aipoipo atu ai i se tagatanu’u o Amerika Samoa, ia poo se isi fo’i itu pe afai o se tama’ita’i mai fafo lea ua ulufale mai ma aoga i le Kolisi Tuufaatasi, ae emo ane le ata ua ma’itaga ma fanau ai lana pepe i Amerika Samoa.
Na taua e Magalei e fa’apea, o ni isi nei o itu e tatau fo’i ona vaavaai i ai le Fono ma le malo i le iloiloina o le tulafono lenei.
Na fa’afetaia e Magalei le tofa mamao mai le afioga i le ali’i sentaoa ia Galea’i e ala i lenei tulafono, peita’i i le itu lava ia tau i le tamaoaiga o le atunu’u, e tele auala e tatau ona puipuia ina ne’i avea ma fa’afitauli i le lumana’i, ona toe pagatia ai loa lea o le atunu’u.
Saunoa Talauega e fa’apea, afai o se tagata mai fafo na ulufale mai i le pemita aoga, ae ua mana’o e fia fa’aipoipo i se tagatanu’u o Amerika Samoa, e tatau ona toe tuua e lea tagata le atunu’u, ona toe ulufale mai ai loa lea ma fa’atino tulaga uma e pei ona moomia i le tulafono.
Na taua e le afioga i le ali’i senatoa ia Tuiasina S. Esera e fa’apea, o se tasi o fa’afitauli o lo o fetaia’i ma Amerika Samoa i le taimi nei i le itu tau femalagaaiga, o le to’atele lea o tagata mai fafo ua ulufale mai ma nonofo i le atunu’u, aemaise lava i tagata mai atunu’u Asia.
“I le avea ai o a’u ma totino o le Komiti Fa’afoe o le Ofisa o Femalagaaiga, o se tasi lenei o mataupu o lo o matou finauina pea i le tele o aso e fono ai le Komiti mo ana fa’aiuga, o se auala e taofiofi ai le soona ulufale mai o tagata mai Asia i Amerika Samoa, ae afai la e pasia lenei tulafono ma saini e le kovana, o le isi lenei auala ou te iloa o le a to’atele ai tagata mai Asia e ulufale mai i Amerika Samoa.
Ae na fa’amanino e Galea’i i luma o le maota e fa’apea, o lo o i ai i totonu o le tulafono le puipuiga pe afai e vaavaai atu le Kovana ua avea le pemita mo fanau aoga ma fa’afitauli i le atunu’u, ona mafai loa lea e le kovana i lona malosi ona ia taofia le toe tu’uina atu o nei pemita.
I le mae’a ai o le iloiloga, na fautuaina ai loa e le maota ia le loia sili a le malo, ina ia galulue ma loia a le fono i le fa’aupuina o teuteuga i le tulafono, ina ia avea ai lenei tulafono o se tulafono e manuia ai tagatanu’u o Amerika Samoa.