O se fonotaga faapitoa i le va o le Komiti o Tuuga Fautasi ma Kapeteni o Fautasi uma sa lau togia mo tuuga o le sisigafu’a o lenei tausaga, lea sa fa’ataunu’uina i le potu fono a le Ofisa o Mataupu Tau Samoa i le taeao ananafi, na fa’alauiloa ai e le Komiti o Tuuga Fautasi la latou fa’aiuga ina ia tofu uma Sa ma fa’ailoga tupe e ta’i $10,000.
E na o le Sa a le Fono Faitulafono ma le Sa a le Sinapioa sa alo e le Ofisa o le Kovana e lei aofia ai i lea fa’aiuga, ae sa tofu i laua ma le fa’ailoga tupe e ta’i $2,000.
O Sa na mafai ona maua a latou fa’ailoga tupe ta’i $10,000 i le taeaao ananafi e aofia ai le Fuao, Paepaeulupoo II, Aeto, Isaulaolemoana III, Fetu o le Afiafi, Mataua, Taema II, Manulele Tausala I ma le Manulele Tausala II, Tama o le Mua’au ma le Fealofani Samoa III.
A o lei tauaao atu teutusi a Sa sa lautogia mo le tuuga o lenei tausaga, na mua’i tulei saunoa le afioga i le Maoputasi ia Mauga e fa’alauiloa le fa’aiuga ua autasi i ai le Komiti, ina ia taofia le fa’ataunu’uina o tuuga fautasi o le fu’a o lenei tausaga, ona o le naunau ia tausi le filemu o afioaga ma au va’a o Sa ta’itasi.
“Talosia ia avea le fa’aiuga ua faia e le Komiti i lenei tausaga e tutupu mai ai ni tulaga manuia mo Amerika Samoa i le lumana’i”, o le saunoaga lea a Mauga, ma ia fautuaaina ai le tatau lea ona tofia se Komisi o Tuuga Fautasi latou te fausiaina tulafono e lima ta’ita’iina ai tuuga fautasi i tausaga i le lumana’i.
Saunoa atili Mauga e fa’apea, e i ai lona talitonuga ua tatau ona galulue ta’ita’i o le atunu’u ma afioga ta’itasi o lo o fai a latou Sa ina ia fai ni fa’ata’ita’iga lelei mo tupulaga o lo o fai ma sui o afioaga ia latou auva’a.
Na fa’afetaia e Mauga afioaga uma o lo o fai a latou Sa i le naunau e fai nei atina’e e mafai ai ona galulue fa’atasi matai ma tupulaga o le nu’u.
“Ae afai e fai lava Sa ae leai ni mea lelei e tutupu mai ai, ona fai loa lea o nei fuafuaga uma ma to’atuga i le komiti ma le malo, ae o le agaga o le komiti ma le malo, afai ua tatou iloa le mea lelei e tatau ona fai, fai loa i le taimi lenei, aua afai tatou te le faia le mea sa’o ma le mea lelei nei, o afea e fai ai, ae afai fo’i tatou te le faia, o ai latou te faia”, o le saunoaga lea a Mauga, ma ia fa’ailoa ai le faaiuga a le Komiti ina ia tutusa uma fa’ailoga tupe o Sa sa lautogia mo le fa’amoemoe o le fu’a o lenei tausaga.
O le afioga i le Malu o le Fale ia Faiivae Iuli Godinet ma Soliai T. Fuimaono na fai ma sui o Kapeteni e fa’afetaia le Komiti e tusa ai o le fa’aiuga.
Ina ua mae’a ona tufa fa’ailoga tupe, sa tula’i le afioga a Soliai ma valaau i Kapteni uma sa i ai i le fonotaga ina ia fa’ailoa le fiafia i le pati pati.
E tusa ai o le fa’aiuga a le Komiti, e $114,000 le aofa’i o le tupe ua fa’aalu e le malo mo tuuga fautasi o lenei tausaga, e ui e leai se tuuga sa fa’ataunu’uina.
Le taimi na tauaao ai e le sui o le Matasaua la latou fa’ailoga tupe e $10,000.
[ata AF]