O le taeao nei lea ua fa’atulaga e tula’i ai le sa avea ma Pulesili o le Ofisa o le Litaea a le malo i luma o le fa’amasinoga maualuga, i le mae’a ai lea o se faaiuga sa faia e le fa’amasinoga faaitumalo i le taeao ananafi, ina ia tu’uina atu lana mataupu e iloiloina i luma o le fa’amasinoga maualuga, i le mae’a ai lea ona talia e le fa’amasinoga faaitumalo o le faaiuga a le ua molia, ina ia fa’aagafua le fa’ataunu’uina o lana ulua’i iloiloga sa faatulaga e faia i le taeao ananafi.
E tusa ai ma fa’amaumauga a le fa’amasinoga, e 20 moliaga o lo o tu’uaia ai e le malo ia Luatua Filisouaina Ta’afua, e afua mai i le fa’alavelave lea sa ia sainia fa’amalosia ai ni siaki se 7 mai le Ofisa o le Litaea, i le aofaiga e silia i le $13,400.
O moliaga o lo o tu’uaia ai e le malo ia Luatua e aofia ai moliaga e fa o lona fa’aaoga fa’agaoi o tupe sa tu’uina atu i lalo o lana vaavaaiga, lima moliaga o le gaoi, tolu moliaga o lona faia o fa’amaumauga tau fa’asese, fitu moliaga o lona sainia fa’amalosia o se saini a se isi tagata, fa’apea ai ma le moliaga e tasi o lona tu’uina atu lea o se siaki e le o i ai se teugatupe i totonu.
E pei ona taua i fa’amaumauga a le fa’amasinoga, afai ae fa’amaonia e le fa’amasinoga moliaga uma fa’asaga ia Luatua, e ono mafai ona fa’asala o ia i se fa’asalaga fa’a falepuipui e oo atu i le 138 tausaga le umi.
I le va o le masina o Me ma Iuni 2015 e pei ona taua i fa’amaumauga a le fa’amasinoga, o lo o tu’uaia ai e le malo ia Luatua i le moliaga o lona sainia fa’amalosi o le saini a le isi tagata i luga o siaki e fitu, ina ua ia sainia siaki ma tu’uina atu i le igoa o le Hardcore Cleaning/ Chin Moananu i le aofaiga o siaki e $3,876.56; $1,898.34; $1,998.23; $1,768.79; $750 ma le siaki mulimuli e $2,145.
Mo le moliaga o le gaoi, o lo o tu’uaia Luatua i lona fa’aaoga o vaega tupe a le malo mai le Ofisa o le Litaea, e aunoa ma se fa’atanaga, i le va o le masina o Novema 2012 e oo atu ia Iuni 2015.
Mo le moliaga o le ave fa’agaoi o meatotino sa tu’uina atu i lalo o lana vaavaaiga, o lo o taua ai e fa’apea, i le va o le masina o Oketopa 2013 e oo atu ia Oketopa 2014, o lo o tu’uaia ai e le malo ia Luatua i lona fa’aaoga fa’agaoi lea o vaega tupe a le Ofisa o le Litaea e aunoa ma le fa’atanaga.
O le taeao nei lea ua fa’atulaga e tula’i ai Luatua i luma o le fa’amasinoga maualuga, mo le tu’uina atu o sana tali e tusa ai o tu’uaiga fa’asaga ia te ia, ma fa’atulaga ai loa le aso e faia ai lana fa’amasinoga autu, po o le faia fo’i lea o ni isi maliliega i le va o itu e lua.
O lo o tumau pea tuutuuga o lo o tatala ai Luatua i tua, talu mai le taimi na ia totogiina ai le $100,000 sa fa’atulaga e le fa’amasinoga e tatala ai o ia i tua, e fa’atalitali ai taualumaga o lana mataupu.