E ui i finagalo sa fa’aalia e ni isi o afioga i Faipule, i ni auala e mafai ai ona toe faia ni teuteuga laiti i le tulafono mo le aso o le palota, ina ia mafai ai ona tapena mai i se isi nofoaga mamao taumafa mo le au palota, nai lo le toe fa’atutu o faleie ma fai ai BBQ i le nofoaga o lo o i ai le fale palota, peita’i na fa’amanino e le Komesina o Palota i afioga i Faipule i le taeao ananafi, le taua tele o le usita’i i le tulafono ma mulimulita’i i ai.
“O lea ua taoto le tulafono sa pasia atu e a outou afioga e fa’asa ai ona toe faia lava ni isi gaioiga i le aso o le palota, o la’u fautuaga la fa’a Ta’ita’i o le Ofisa o Palota, aua tatou te toe taumafai e tu’u i ai ni isi suiga po o le taumafai e faia ni auala e toe teuteu ai, ae ia tatou usita’i ma tausisi i le tulafono ua mae’a ona pasia”, o le saunoaga manino lea a le afioga a Uiagalelei Dr. Lealofi Uiagalelei ina ua molimau i luma o le Komiti o Palotaga a le maota o sui ananafi.
E ui o lea ua taoto ma manino le tulafono, ae na toe valaauina lava e le maota o sui lenei iloiloga, mo le Komesina o Palota na te toe fa’amaninoina ai atili le tulafono e fa’atatau i le aso o le palota.
Na fesili le afioga i le ali’i faipule mai Manu’a #1 ia Vesi Talalelei Fautanu Jr, pe mafai ona fa’atino lava lana BBQ i lona fale i le aso o le palota, ona fai lea i tagata palota pe a uma ona faia a latou palota, e aga’i i lona fale e piki mai ai ni a latou ipu meaai, ae na fa’amanino e Uiagalelei, e le o fa’atagaina i le tulafono le tulaga lea.
Na fesili le afioga i le ali’i faipule ia Fetu Fetui Jr mai le itumalo o Manu’a #1, pe fa’ataga faleie mo tagata matutua e koma i ai i le la po o le timu fo’i i le aso o le palota, ae na saunoa le Komesina o Palota, e le fa’atagaina i le tulafono lea tulaga.
Na fesili le afioga i le ali’i faipule ia Puleleiite Li’amatua Tufele, pe fa’afefea tiute tauave i nu’u ma Ekalesia e pei o fafaga i le Faifeau, ae pau tonu lava i le aso o le palota, pe afaina le fa’atinoina pea o tulaga ia ona ua mae’a ona tapena, ae na fa’amanino e le Loia Sili ia Talauega Eleasalo Ale, e mafai lava ona fa’atino tulaga uma ia i isi aso, ae a oo loa i le aso o le palota, fai mai le tulafono, e le fa’atagaina tulaga e pei ona fesiligia, ona e avea lea ma auala e fa’alavelave ai i le palota a le atunu’u.
O le agaga o le tulafono na pasia e le Fono Faitulafono mo le aso o le palota e pei ona saunoa le Komesina o Palota, e le gata ia maua ai e le atunu’u atoa le filemu i le aso o le palota, a ia maua ai fo’i e tagata palota le avanoa e faia ai la latou filifiliga tonu i le sui ua agava’a ma talafeagai mo le tofi.
E tele ni isi o fa’afitauli na tutupu i palota ua mavae na fa’aleo e ni isi o afioga i Faipule i le taimi o le iloiloga, e pei o le mataupu na saunoa i ai Fetui Jr, o le tatala lea e le aufaigaluega o palota fa’apitoa ua mae’a ona tu’u i totonu o le teutusi, ae sa tatau ona fa’atali se’i taunu’u le pusa palota i le Ofisa o Palota mo le faitauina o palota, ona fa’atoa tatala lea, atoa ai ma le mataupu na fa’aleo e le afioga a Maugaoalii Leapai Tusipa Anoa’i, i le tatau lea ona fesuisuia’i tagata faigaluega e fa’atautaia palota i fale palota ta’itasi, nai lo le tofia o tagata tuai lava ia e fai palota i fale palota ua silia i le ta’i 3 tausaga palota o galulue ai pea.
O se tasi o fa’afitauli na fa’aleo e Vui Florence Vaili Saulo, o le to’atele o tagatanu’u e le o fa’atinoina le latou aia e palota ai i taimi o sailiga tofi a le atunu’u.
Na taua e Vui e fa’apea, ua i ai lona lagona i lona fia fa’auluina lea o se tulafono, e poloaina ai tagatanu’u uma ina ia palota, atoa ai ma se sala e fa’aee i le tagatanu’u pe afai e le palota i le taimi o le palota, ae na saunoa le Komesina o Palota e fa’apea, o le palota, o le aia tatau lea a le tagatanu’u e filifili ai o ia i le tagata e tatau ona palota i ai, poo lona le palota fo’i, ma i lona talitonuga, e le tatau ona fa’atulafonoina lea tulaga, aua o loo i le tagatanu’u le faitalia ma le aia e palota ai.
Ae na toe saunoa Vui e fa’apea, e ui o le aia a le tagatanu’u e palota ai, ae o lona tiute le tatau lea ona alu e palota.